धनगढी । काम सानो वा ठूलो हुँदैन, निरन्तर मेहनत र संघर्ष गर्दै अघि बढे सफलता एक दिन अवश्य मिल्छ। यसको उदाहरणीय पात्र हुन् धनगढी उपमहानगरपालिका–३ का मुक्तिनाथ नेपाल।
करिब २०६५ सालतिरको कुरा हो। नेपाल धनगढीको चौराहस्थित एउटा घरमा मासिक ७ हजार ५ सय रुपैयाँ भाडा तिरेर बस्दै आएका थिए। कमजोर आर्थिक अवस्थाका कारण परिवारको दैनिक गुजारा चलाउनसमेत चुनौती थियो। तर, परिस्थितिसँग हार मान्नुको सट्टा उनले व्यापार गर्ने सोच बनाए।
व्यवसाय सुरु गर्न आवश्यक लगानी जुटाउने क्रममा उनको परिचय हिमशिखर सहकारी संस्थासँग भयो। सहकारीको सहयोगमा पहिलो वर्षमै करिब १ लाख रुपैयाँसम्म ऋण लिएर उनले धनगढी चौराहमा कपडा पसल सञ्चालनमा ल्याए।

“पहिलेको अवस्था निकै कमजोर थियो। तर, व्यापार गर्दै जाँदा विस्तारै सुधार हुँदै गयो,” नेपालले भने।
अहिले उनको कपडा पसल धनगढीको उत्तरबेहिणी चोकमा सञ्चालनमा छ। करिब १९ वर्षको व्यवसायिक यात्रामा उनले व्यापारबाटै धनगढीमा घर निर्माण गर्न सफल भएका छन्। आफ्ना छोराछोरीलाई काठमाडौंमा पढाउन सक्ने अवस्था बनेकोमा उनी सन्तुष्ट छन्।
नेपालका अनुसार व्यवसाय विस्तारमा हिमशिखर सहकारीको ऋण सहयोग महत्वपूर्ण बनेको छ। उनले हालसम्म पटक–पटक गरी पाँच पटकसम्म सहकारीबाट ऋण लिएका छन्। सुरुमा करिब डेढ लाखदेखि पछिल्ला चरणमा साढे दुई लाख रुपैयाँसम्म ऋण लिएर व्यवसायमा लगानी गरेको उनले बताए।
कपडा पसलसँगै अहिले उनले अर्को व्यवसायका रूपमा अटो रिक्सा पनि सञ्चालनमा ल्याएका छन्।

नेपालका लागि सहकारीको सहयोग केवल आर्थिक ऋणमा मात्र सीमित छैन। त्यसले उनको परिवारको जीवनस्तर सुधार्न, घर निर्माण गर्न तथा छोराछोरीको शिक्षामा लगानी गर्नसमेत महत्वपूर्ण भूमिका खेलेको उनको भनाइ छ।
“हिमशिखरको सहयोगले आर्थिक अवस्था सुधार्नुका साथै घर–परिवार र बालबच्चाको पढाइलेखाइ सबै राम्रो हुँदै गएको छ,” उनले भने।
करिब दुई दशक लामो व्यवसायिक यात्रालाई सम्झिँदै नेपाल भन्छन्, “परिश्रम गर्दै गयो भने एक पटक सफलता मिल्दो रहेछ। पहिलेको भन्दा अहिले निकै राम्रो हुँदै गएको छ।”