धनगढी । धनगढी उपमहानगरपालिका-१३ स्थित प्रादेशिक आयुर्वेद चिकित्सालय व्यवस्थापन समितिका अध्यक्ष कर्णबहादुर बलायरले अस्पतालको व्यवस्थापकीय पक्षलाई पहिलो प्राथमिकतामा राखेर काम गरिरहेको बताएका छन ।
उनले अस्पतालभित्रका विभिन्न युनिटको हालको अवस्था र सुधार गर्नुपर्ने कुरालाई आफूले प्राथमिकता दिएर काम भैरहेको बताए ।
उनले भने ‘मैले व्यवस्थापकीय जिम्मेवारी लिएको दुई महिना भयो । यहाँका प्रत्येक युनिटसँग बसेर यहाँको समस्या,प्रदान हुने सेवाका बारेमा जानकारी लिने काम गरेको छु । आगामी दिनमा सुधार गर्नुपर्ने कुरालाई ध्यानमा राखेर काम अगाडि बढाएका छौँ ।’
उनले अस्पतालमा सरसफाइ,शौचालय तथा खानेपानीको अवस्थाका बारेमा जानकारी लिएको बताउँदै त्यसमा आवश्यकता अनुसार व्यस्थापन गरिने बताए ।
त्यस्तै,उनले पछिल्लो समय अस्पतालमा सेवा विस्तारका काम पनि भइरहेको बताए ।
उनले भने ‘हामीले हालै जडिबुटी प्रशोधन केन्द्र सञ्चालनमा ल्याएका छौँ । हामी आइसकेपछि रेडियोलोजी सेवा सुरु गरेका छौं ।’
अध्यक्ष बलायरले ल्याब,वार्ड व्यवस्थापनका कुरालाई पनि अगाडि बढाइएको बताउँदै सेवा विस्तार गर्ने योजनासहित काम भइरहेको बताए ।
उनले भने ‘ओएनएम अगाडि बढेको छ । ५० शय्याको अस्पताल भयो भने,दरबन्दी पूरा भयो भने सेवा पनि विस्तार गर्ने अभिप्रायका साथ अगाडि बढेका छौँ ।’
