धनगढी । धनगढी उपमहानगरपालिका–३, चटकपुरमा याडिया ब्रान्डको विद्युतीय स्कुटरको नयाँ शोरुम उद्घाटन गरिएको छ।
कैलाली उद्योग वाणिज्य संघका अध्यक्ष पुष्कर ओझाले शुक्रबार एक कार्यक्रमबीच शोरुमको उद्घाटन गरेका हुन्। उद्घाटन कार्यक्रममा बोल्दै अध्यक्ष ओझाले विद्युतीय सवारीसाधनसँगै विद्युतीय स्कुटरले आगामी दिनमा बजारमा राम्रो स्थान बनाउने विश्वास व्यक्त गरे।
भारत तथा चिनियाँ ब्रान्डका विद्युतीय सवारीसाधनसमेत नेपाली बजारमा आइसकेको उल्लेख गर्दै उनले आगामी दिनमा यस्ता सवारीसाधनको प्रयोग अझै बढ्ने बताए। वातावरणमैत्री हुनुका साथै सञ्चालन खर्च कम हुने भएकाले ग्राहकको रोजाइ विद्युतीय सवारीसाधनतर्फ बढिरहेको उनको भनाइ थियो।
याडियाका सेल्स हेड प्रदीप पालले सुदूरपश्चिमका लागि चारवटा मोडेलका विद्युतीय स्कुटर बजारमा ल्याइएको जानकारी दिए। उनका अनुसार स्कुटरको मोडेलअनुसार मूल्य २ लाख ८० हजारदेखि ३ लाख ३० हजार रुपैयाँसम्म रहेको छ ।
याडियाका प्रबन्धक सौभाग्य सिंहले सुदूरपश्चिममा विद्युतीय स्कुटर ग्राहकको रोजाइमा पर्ने विश्वास व्यक्त गर्दै क्षेत्रीय बजारमा विद्युतीय सवारीसाधनको माग बढ्दै गएको बताए।
