धनगढी । कैलालीको चिसापानीदेखि मोहन्यालगाउँपालिका–७ कुइने हुँदै पश्चिम सुर्खेत जोड्ने सडक वर्षाका कारण पटक–पटक अवरुद्ध हुँदा यात्रु तथा स्थानीयवासीले सास्ती खेप्नुपरेको भन्दै सडक तत्काल सञ्चालन गर्न प्रदेश सरकारसँग माग गरिएको छ।
नेकपा एमाले पार्टीका मोहन्याल इन्चार्ज एवं पत्रकार  वीरेन्द्रबहादुर रावलले सुदूरपश्चिम प्रदेशका मुख्यमन्त्री, भौतिक पूर्वाधार विकासमन्त्री, प्रदेशस्थित राजनीतिक दलका संसदीय दलका नेता तथा सडक डिभिजन कार्यालयलगायत सरोकारवाला निकायको ध्यानाकर्षण गराउँदै सडक मर्मत तथा स्तरोन्नतिलाई प्राथमिकतामा राख्न आग्रह गरेका हुन्।
उनका अनुसार चिसापानीदेखि कुइनेसम्मको करिब १० किलोमिटर सडक खण्डको अवस्था कमजोर हुँदा वर्षायाममा यातायात सञ्चालनमा समस्या हुने गरेको छ। कचाली, बाँका र केलाडी भीर क्षेत्रमा पहिरो जाँदा सडक अवरुद्ध हुने र बिरामीलाई समेत अस्पतालसम्म लैजान कठिन हुने अवस्था रहेको उनले बताएका छन्।
रावलले तत्कालका लागि प्रभावित स्थानमा डोजर तथा एक्स्काभेटर परिचालन गरी पहिरो हटाउने, साइड नाली व्यवस्थापन गर्ने र ग्राभेल गर्ने व्यवस्था गर्न माग गरेका छन्। यसबाट वर्षायाममै पनि यातायात सञ्चालनलाई सहज बनाउन सकिने उनको भनाइ छ।
चिसापानी–जंगलघाट सडक लामो समयदेखि निर्माणाधीन रहे पनि हालसम्म अपेक्षित रूपमा स्तरोन्नति हुन नसकेको भन्दै उनले ठेक्का लिएको निर्माण कम्पनीलाई प्रभावकारी रूपमा काम अघि बढाउन प्रदेश सरकारले दबाब दिनुपर्ने माग गरेका छन्।
अछाम, दैलेख, सुर्खेत, कालिकोट, जुम्ला, हुम्ला तथा बाजुरालगायतका जिल्लाका नागरिकका लागि यो मार्ग छोटो आवागमनको महत्वपूर्ण सडक भएकाले दीर्घकालीन रूपमा सडक निर्माणलाई तीव्रता दिनुपर्ने रावलको माग छ।
उनले वर्षायाम सकिएलगत्तै ठेक्का भएको सडकखण्डको निर्माण कार्यलाई गति दिई समयमै सम्पन्न गर्ने वातावरण बनाउन प्रदेश सरकारसँग आग्रह गरेका छन्।