धनगढी । कैलालीका तीन स्थानीय तहमा जापानिज इन्सेफ्लाइटिस (जेई) विरुद्धको खोप अभियान सञ्चालन गरिने भएको छ ।
जापानिज इन्सेफ्लाइटिस (जेई) को संक्रमणदर बढ्दै गएपछि कैलालीमा असोज १ गतेदेखि अभियान सञ्चालन गरिने भएको हो।
स्वास्थ्य सेवा विभाग, परिवार कल्याण महाशाखाअन्तर्गत बाल स्वास्थ्य तथा खोप सेवा शाखाका प्रमुख डा. अभियान गौतमका अनुसार जेई संक्रमणको जोखिमलाई ध्यानमा राख्दै पहिलो चरणमा कैलाली र झापामा खोप अभियान सञ्चालन गर्न लागिएको हो। झापामा ५ गतेदेखि सो अभियान सञ्चालन हुनेछ ।
कैलालीका धनगढी उपमहानगरपालिका, लम्किचुहा नगरपालिका र घोडाघोडी नगरपालिकामा खोप अभियान सञ्चालन हुनेछ। अभियानमा ३० वर्ष वा सोभन्दा माथिका व्यक्तिलाई जेई विरुद्धको खोप लगाइने जनाइएको छ।
अभियानका लागि आवश्यक जेई खोप काठमाडौंस्थित केन्द्रिय खोप भण्डारण केन्द्रबाट सम्बन्धित जिल्लामा पठाउने तयारी भइरहेको छ। खोप उपलब्ध भएपछि स्थानीय तह र स्वास्थ्य संस्थामार्फत अभियान सञ्चालन गरिनेछ। यसैगरी पहिलो चरणअन्तर्गत झापा जिल्लाका सबै स्थानीय तह पनि खोप अभियान सञ्चालन गरिने स्वास्थ्य तथा खाद्य स्वच्छता मन्त्रालयले जनाएको छ ।
