रमेश केसी
बझाङ । चैनपुर शहरी खानेपानी उपभोक्ता समिति, बझाङको अध्यक्षमा लोकेन्द्र विष्ट विजयी भएका छन् । करिब एक दशकपछि भएको निर्वाचनमा विष्टले ४१९ मत प्राप्त गर्दै अध्यक्षमा निर्वाचित भएका हुन् ।
अध्यक्षका प्रतिस्पर्धी नरेन्द्र खड्काले १२१ र लोकेन्द्र खड्काले १२५ मत प्राप्त गरे । उपाध्यक्षमा कलक बोहराले ३६५ र देवेन्द्र खड्काले ३५६ मत प्राप्त गर्दै विजयी भए ।
सचिवमा निरन विष्ट २६५ मत प्राप्त गर्दै निर्वाचित भए ।सचिवका प्रतिस्पर्धी शंकर रसाइलीले १९३, जगदीश रोकायाले ७१ र गोविन्द विकले ७४ मत प्राप्त गरे ।
कोषाध्यक्षमा देवकी सिंह ३२५ मतसहित विजयी भइन् । त्यस्तै, सह–सचिवमा सुनिल नेपाली ३१२ मत प्राप्त गर्दै विजयी भए। जनक धामीले २९९, लोकेन्द्र विकले २६८ र मनिराम उपाध्यायले १३९ मत प्राप्त गरे ।
जनजाति सदस्यतर्फ सुसिलराम जोशी ३२४ मतसहित विजयी भए भने कञ्जु भण्डारीले २५९ मत प्राप्त गरे ।
सदस्य पदमा दुर्गाले ३७३, निर्मलाले ३४०, सञ्जलीले २५४, पुनमले २४५ र धनलक्ष्मीले २०० मत प्राप्त गरेका छन् । निर्वाचनमा कुल ७०९ मत खसेको थियो ।
नवनिर्वाचित पदाधिकारी तथा सदस्यहरूले चैनपुरका उपभोक्तालाई नियमित, स्वच्छ र गुणस्तरीय खानेपानी सेवा उपलब्ध गराउन प्राथमिकताका साथ काम गर्ने प्रतिबद्धता जनाएका छन् ।
लामो समयदेखि होटल व्यवसाय गर्दै आएका उपभोक्ता धनबहादुर शाहीले खानेपानीको महसुल र धारा जडान शुल्क घटाउनुपर्ने माग गरे । धारामा नियमित पानी आउनुपर्ने तथा खानेपानी वितरणमा समस्या भएमा उपभोक्तालाई समयमै जानकारी गराउनुपर्ने उनको भनाइ छ ।
चैनपुरमा हाल सेती नदीबाट लिफ्टिङ प्रविधिमार्फत खानेपानी वितरण हुँदै आएको छ । चैनपुर बजार, भोपुर, रुइनाबगर, देवल, गोलाइलगायतका बस्तीमा खानेपानी वितरण भइरहेको छ ।
सेती नदीमा निर्भर लिफ्टिङ खानेपानी प्रणाली जोखिममा रहेकाले दीर्घकालीन विकल्प खोज्नुपर्ने आवाज उपभोक्ताले उठाउँदै आएका छन् । खानेपानी समितिले वैकल्पिक मुहानको खोजी गरी दिगो खानेपानी व्यवस्थापनतर्फ अघि बढ्नुपर्ने उनीहरूको माग छ ।
