काठमाडौँ । भागदौड र भ्याइनभ्याइले भरिएको जीवनशैली अनि खानपानको बानीबिच मानिसहरूले आफ्नो शरीरलाई स्वस्थ राख्न आफ्नो दैनिक दिनचर्यामा प्राकृतिक तत्त्वहरू समावेश गरिरहेका छन् । यस्तै एउटा लाभदायक तरकारी हो लौका । यसको जुस पोषक तत्त्वहरूले भरिपूर्ण मानिन्छ ।

बिहान सही तरिकाले लौकाको जुस पिउनाले शरीरलाई ताजा बनाउँछ र पाचन प्रक्रियालाई राम्रोसँग कायम राख्न मद्दत गर्छ । आजको यस लेखमा हामी लौकाको जुस सेवनका फाइदा र यसलाई सेवन गर्ने सही तरिकाबारे कुराकानी गर्नेछौँ ।

भान्सामा सजिलै उपलब्ध हुने तरकारी हो लौका । यसको जुस शरीरलाई शीतल पार्न र यसको हाइड्रेसन आवश्यकताहरू पूरा गर्न अत्यन्तै लाभदायक साबित हुन सक्छ । यसमा पानीको मात्रा धेरै हुन्छ । यसले शरीरमा तरल पदार्थको पूर्ति गर्न मद्दत गर्छ । ताजा लौकाको जुस हाइड्रेसनको लागि पनि लाभदायक छ । खाली पेटमा यसलाई सेवन गर्नु अझ राम्रो मानिन्छ ।

अत्यधिक पसिना आउँदा शरीरमा निर्जलीकरण हुन्छ र थकान पनि निम्त्याउन सक्छ । लौकाको जुसले शरीरलाई तरलता पुनःपूर्ति गर्न मद्दत गर्न सक्छ । यसले पेटको तापलाई पनि शान्त पार्छ । यो हल्का र सजिलै पचाउन सकिने हुन्छ, जसले गर्दा यसलाई उपयोगी खाना बनाउँछ । पेटको रोगहरूको लागि त झन् यो रामबाण हो ।

लौकामा प्रचुर मात्रामा फाइबर पाइन्छ । यो पाचन प्रणालीको लागि धेरै फाइदाजनक हुन्छ । यसलाई आफ्नो आहारको नियमित भागको रूपमा समावेश गर्नाले पाचन सुधार गर्न मद्दत मिल्छ । पर्याप्त मात्रामा फाइबरले कब्जियत जस्ता समस्याहरूबाट पनि बच्न मद्दत गर्छ । लौकालाई तरकारीको रूपमा खानु पनि स्वास्थ्यको लागि अत्यन्तै फाइदाजनक छ ।

लौकामा पोटासियम सहित धेरै पोषक तत्त्वहरू हुन्छन् । पोटासियमले शरीरमा सामान्य रक्तचाप कायम राख्न मद्दत गर्छ । यद्यपि, मुटु वा रक्तचापको औषधि लिनेहरूले डाक्टरसँग परामर्श गर्नुपर्छ । आफ्नो तौल नियन्त्रण गर्न खोज्दै हुनुहुन्छ भने, तपाईँले आफ्नो आहारमा लौका समावेश गर्न सक्नुहुन्छ । यसमा क्यालोरी कम पाइन्छ ।

लौका सेवन गर्दा लामो समयसम्म पेट डम्म भरिएको महसुस हुन सक्छ । तर, लौकाको जुस मात्र पिउनाले तौल घट्दैन । यसका लागि सन्तुलित आहार र नियमित शारीरिक गतिविधिरयोग पनि चाहिन्छ । मधुमेहका बिरामीहरू प्रायः आफ्नो आहारको बारेमा सतर्क हुन्छन् । लौका कम क्यालोरी भएको तरकारी हो । मधुमेहका बिरामीले पनि यसलाई सन्तुलित आहारको रुपमा समावेश गर्न सक्छन् । तर यसको सेवन गर्नु अघि विशेषज्ञहरूको सल्लाह आवश्यक छ ।

यसरी बनाउनुस् लौकाको जुसः

जुस तयार गर्न ताजा, सफा लौका लिनुहोस्
यसलाई राम्ररी धुनुहोस् र बोक्रा ताछ्नुहोस्
यसमा भएका सबै बिया निकाल्नुहोस्
लौकाको तीतो रस हानिकारक हुन्छ । त्यसैले, तीतो लौकाको जुस खानबाट बच्नुहोस् ।
ताजा बनाइएको जुस मात्रै पिउनुहोस्
एक पटक तयार पारेपछि लामो समयसम्म राखेर जुस खाँदै नखानुस् ।
लौकाको जुस तितो छ भने यसलाई पिउनु हुन्न । तितो लौकामा प्राकृतिक यौगिकहरू हुन सक्छन् जसले बान्ता, पेट दुख्ने र गम्भीर विषाक्तता निम्त्याउन सक्छ । त्यसैले, फाइदा पाइने चक्करमा जस्तो पायो त्यस्तै लौकाको जुसको सेवन पनि अत्यन्त हानिकारक हुन सक्छ ।एजेन्सी