धनगढी । कैलालीको कैलारी गाउँपालिका-३ भडरीस्थित हुलाकी सडकमा मोटरसाइकलले गोरुगाडालाई पछाडिबाट ठक्कर दिँदा एक जनाको मृत्यु भएको छ भने दुई जना घाइते भएका छन् ।
शुक्रबार बेलुका पश्चिमबाट पूर्वतर्फ जाँदै गरेको से ५ प ३४६५ नम्बरको मोटरसाइकलले सोही दिशातर्फ गइरहेको गोरुगाडालाई पछाडिबाट ठक्कर दिएको हो ।
दुर्घटनामा मोटरसाइकल चालक भजनी नगरपालिका-१ बस्ने १८ वर्षीय सुजन चौधरी गम्भीर घाइते भएका थिए । उपचारका लागि धनगढीस्थित निसर्ग अस्पताल लगिएका चौधरीको उपचारकै क्रममा मृत्यु भएको प्रहरीले जनाएको छ।
मोटरसाइकलको पछाडि सवार भजनी नगरपालिका-१ की ५० वर्षीया ज्ञानमती डगौरा र गोरुगाडा चालक कैलारी गाउँपालिका-३ भडरी बस्ने ५५ वर्षीय खुसीराम चौधरी पनि घाइते भएका छन् ।
ज्ञानमतीको निसर्ग अस्पतालमा उपचार भइरहेको छ भने गोरुगाडा चालक खुसीरामलाई उपचारपछि प्रहरीले नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ।
