धनगढी- आगामी मंसिर ४ गते हुने प्रतिनिधि तथा प्रदेश सभाको निर्वाचनको मिति नजिकिँदै जाँदा उम्मेदवारहरुले चुनावी प्रचार–प्रसारलाई तिब्रता दिएका छन् । उम्मेदवार तथा दलहरु मतदाताको घरदैलोमा गएर मतदातालाई आफ्नो पक्षमा पार्ने कसरत गरिरहेका छन् । टोलटोलका घरहरुमा गएर मतदातामाझ भाषण गर्दै आफ्नो प्रतिबद्धता जनाउनेसम्मका कार्यहरु उम्मेदवारहरुले गरिरहेका छन् ।

कैलाली निर्वाचन क्षेत्र नम्बर ५ (ख) का प्रदेशसभा सदस्य उम्मेदवार प्रकाश देउवाले पनि आफ्नै तरिकाले चुनावी प्रचार शैलीलाई अगाडि बढाइरहेका छन् । उनले अरु उम्मेदवारहरु भन्दा फरक शैलीमा मतदातालाई भेटिरहेका छन् । दलबल लिएर भन्दा पनि सानो झुण्डमा उनी मतदाताको घरदैलोमा पुगेर मत मागिरहेका छन् ।

विशेष गरी लोकतान्त्रिक वाम गठबन्धनको तर्फबाट उम्मेदवार बनेका नेपाली काँग्रेसका युवा नेता देउवाले आफ्नो चुनावी प्रचार शैलीलाई भाषण भन्दा विकास तथा समृद्धिका लागि प्रतिबद्धता जनाउने तरिकाले अघि बढाइरहेका छन् । निर्वाचित भइसकेपछि यस क्षेत्रको विकासका लागि आफूले सक्ने प्रतिबद्धता मतदाता बताइरहेका छन् ।

देश र जनताको विकासका लागि आफू राजनीतिमा आवद्ध भएको प्रट्याउँदै उनी भाषण भन्दा पनि प्रतिबद्धता जनाउँदै हिँडिरहेका छन् । खासै भाषण पनि नगर्ने देउवाको पहिलो प्राथमिकतामा नै विकासे एजेण्डा छन् । ‘धनगढीको विकासका लागि नै प्रदेशसभा सदस्यमा मेरो उम्मेदवारी हो’, उनले भने, ‘अब राजनीति क्रान्ति भन्दा पनि देशले विकास खोजेको छ ।’ उनले आफु कुनैपनि स्वार्थपूर्ति गर्न राजनीतिमा नआएको बताउँदै युवाको नेतृत्व गर्दै विकास समृद्धिमा सक्रिय हुने बताए ।

भाषण गरेर झुट्टा आश्वासन बाड्नु भन्दा पनि हरेक नागरिकको घर दैलोमा पुगेर समस्याहरु सुन्ने काम भइरहेको उनको भनाई छ । धनगढीको विकासका लागि स्थानीयस्तरबाट मात्र सम्भव नभएको हुँदा प्रदेश र संघीय सरकारबाट पहल गर्ने योजना रहेको उनले सुनाएका छन् । ‘धनगढी सुदूरपश्चिमको एक मुख्य सहर हो । यहाँको विकासका लागि केन्द्रस्तरबाट नै पहल चाल्न पनि त्यतिकै आवश्यक देखिएको छ’, उनले भने, ‘त्यसको लागि मेरो तर्फबाट पूर्ण पहल हुने छ ।’

उम्मेदवारी मनोनयन देखि नै मतदाताहरुको घर दैलोमा विहान देखि साँझसम्म व्यस्त देउवा भाषण भन्दा पनि विकासमा मुद्धामा बढी फोकस भएको उनीसंगै घर दैलोमा गईरहेका युवा रमेश चन्दले बताए । ‘कैलाली–५ ‘ख’ मा सबै भन्दा बढी डुवान र सडक स्तरोन्नति हुन नसकेको गुनासो धेरैको सुनिन्छ’, चन्दले भने, ‘त्यस्ता समस्याहरु समाधानका लागि निर्वाचन घोषणा पत्र सहित मतदाताहरु भलाकुसारी भइरहेको छ ।’ उनले कुनै जात, क्षेत्र भन्दा पनि समग्र धनगढीको विकासका लागि आफ्नो योजनाहरु प्रस्तुत गरिहेका चन्दले बताए ।

कैलाली ५ ‘ख’ कांग्रेस नेता प्रकाश देउवासँगै २०७४ सालमा सम्पन्न स्थानीय तह निर्वाचनमा एमालेका तर्फबाट धनगढीको मेयरमा पराजित दुर्गा जोशी प्रदेशसभा सदस्यको उम्मेदवार रहेका छन् । लोकत्रान्तिक–बाम गठबन्धन भएको हुँदा देउवालाई जित्न सहज हुने गठबन्धन दलहरुको दाबी छ ।

अर्कोतर्फ उनीविरुद्ध कांग्रेस छोड्दै स्वतन्त्र उम्मेदवारी दिएका क्षितिज भण्डारीको समेत उम्मेदवारी छ । उनले पनि गठबन्धन दल र त्यसमा पनि कांग्रेसकै भोट काट्ने बढी काट्न सक्ने आँकलन गरिएको छ । तर पनि जित देउवाकै हुने दाबी उनीहरुको छ ।

यस क्षेत्रको प्रदेशसभा ‘ख’ मा धनगढी उपमहानगरपालिका वडा नम्बर १ देखि ६, ११ र १३ नम्बर वडा रहेका छन् । गत वैशाख ३० गते सम्पन्न स्थानीय तह निर्वाचनमा वडा नम्बर ११ एमाले, वडा नम्बर ६ माओवादीले जितेका वडा हुन् भने बाँकी ६ वटा वडामा प्यानलसहित कांग्रेसले जितेको छ । स्थानीय तहको निर्वाचन मतलाई आधार मान्ने हो भने देउवा जितका लागि धेरै अगाडि छन् ।