काठमाडौं – भारतले टी–२० विश्वकप क्रिकेटमा बंगलादेशविरुद्ध रोमाञ्चक जित निकालेको छ । बुधबार अस्ट्रेलियाको एडिलेडमा भएको खेलमा भारतले बंगलादेशलाई पाँच रनले पराजित गरेको हो ।
१८५ रनको विजयी लक्ष्य पछ्याउँदै ब्याटिङ गरेको बंलागदेशले सात ओभरको समाप्तिमा विना विकेट ६६ रन बनाउँदा पानी परेको थियो । पानी परेपछि केहि बेर खेल रोकिएको थियो । वर्षाको कारण खेल रद्द भएको खण्डमा डीएल मेथर्डमा बंलादेशले भारतलाई १७ रनले पराजित गर्ने थियो । तर खेल पुनः सुरु हुने भएपछि खेल १६ ओभरमा छोट्याइएको थियो । १६ ओभरमा घटाएको खेलमा बंगलादेशले १५१ रनको नयाँ लक्ष्य पाएको थियो । तर १६ ओभरको समाप्तिमा बंगलादेशले ६ विकेटको क्षतिमा १४६ रन मात्रै बनाएपछि भारतले जित निकालेको हो ।
पानी पर्नुअघि उत्कृष्ट प्रदर्शन गरेको बंगलादेशले त्यसपछि ओसिलो मैदानमा राम्रो प्रदर्शन गर्न सकेन । बंगलादेशका लिटोन दसले २७ बलमा ६० रन बनाए । त्यस्तै, नुरुल हसनले अविजित २५, नजमुल हुसेनले २१ र कप्तान सकिब अल हसनले १३ रन बनाए । बलिङतर्फ भारतका हार्दिक पाण्ड्या र अर्शदिप सिंहले समान २–२ विकेट लिए ।
यसअघि टस हारेर पहिले ब्याटिङ गरेको भारतले निर्धारित २० ओभरमा ६ विकेटको क्षतिमा १८४ रन बनाएको थियो । भारतका लागि विराट कोहलीले अविजित ६४ रन बनाए । त्यस्तै, केएल राहुलले ५० र सूर्यकुमार यादवले ३० रन बनाए । बलिङतर्फ बंगलादेशका हसन मोहमुदले तीन र शकिब अल हसनले दुई विकेट लिए ।
बंगलादेशलाई पराजित गर्दै भारत समूह २ मा चार खेलबाट ६ अंक बनाएर शीर्ष स्थानमा उक्लिएको छ । यता, तेस्रो स्थानमा रहेको बंगलादेशको भने चार खेलबाट चार अंक नै छ । दोस्रो स्थानमा रहेको दक्षिण अफ्रिकाको तीन खेलबाट पाँच अंक छ ।
जिम्बाब्वे चार खेलबाट चौथो स्थानमा रहँदा तीन खेलबाट दुई अंक बनाएको पाकिस्तान पाँचौँ स्थानमा छ । आजै भएको अर्को खेलमा जिम्बाब्वेलाई पराजित गरेको नेदरल्यान्ड्स भने दुई अंक बनाएर पुछारमा छ ।
