धनगढी- कैलालीमा चालु आर्थिक वर्षको एक महिनामा १३५ जनामा डेंगी संक्रमणका बिरामी फेला परेका छन् ।
चालु आर्थिक वर्षको साउन मसान्तसम्म मात्रै १३५ जना डेंगी संक्रमणका बिरामी फेला परेका हुन् । कैलालीमा सबै भन्दा बढी लम्की चुहामा २३ जना डेंगी संक्रमण फेला परेका छन् ।
त्यस्तै बर्दगोरियामा १५ जना, ,धनगढीमा १२ जना, घोडाघोडीमा १, गौरीगगामा १, भजनी र जोशीपुरमा ७ जना, कैलारी २, टिकापुर २, गोदावरी ११, चुरे १, जानकी ८ जनामा डेंगी सक्रमीत फेला परेका छन् ।
गत वर्ष कैलालीमा ४५५ जनामा डेङ्गु सङ्क्रमण भएको थियो । जसमध्ये तीन जनाको ज्यान गएको थियो । त्यसअघि २०७६–७७ मा ४१, २०७७–७८ मा १०१ र २०७८–७९ मा १९८ जनामा डेङ्गु पुष्टि भएको थियो ।
कैलालीमा डेङ्गुका बिरामी बढ्दै गएकाले रोकथामको अभियानलाई तीब्रता दिइएको छ । डेङ्गु नियन्त्रणका लागि लार्भा खोजी र नष्ट अभियानलाई जेठबाटै सञ्चालन गरिए पनि केस बढ्दै जाँदा अभियान अझै अपुग देखिको जनस्वास्थ्य निरीक्षक विमला ज्ञवालीले बताइन् ।
एडिस प्रजातिको पोथी लामखुट्टेको टोकाइबाट डेङ्गु रोग लाग्ने गरेको छ । यो प्रजातिको लामखुट्टेले दिउँसोमा मात्रै मानिसलाई टोक्ने गर्छ । भाइरसबाट लाग्ने डेङ्गु रोग रोकथामको एक मात्र भरपर्दो उपाय डेङ्गु सार्ने लामखुट्टेको लार्भा खोज र नष्ट अभियान रहेको जनाइएको छ ।
यसका साथै, घर वरिपरि पानी जम्न नदिनुका साथै बट्टा, गमला, टायर, प्लाष्टिकको डब्बा, ड्रमलगायतमा जमेको पानी बेला–बेला फाल्न आवश्यक रहेको स्वास्थ्यकर्मीले बताएका छन् । डेङ्गुबाट जोगिनका लागि लामखुट्टेको वृत्ति विकास रोक्न आवश्यक रहेको जिल्ला स्वास्थ्य कार्यालयका निमित्त प्रमुख तेजविक्रम शाहीले बताए ।
उनले महामारी बहुआयामिक समस्या रहेकाले डेङ्गुको महामारी रोक्न सबै आफ्नो ठाउँबाट लाग्न आवश्यक रहेको बताए । डेङ्गुबाट जोगिनका लागि वर्षायाममा असोज महिनासम्म सतर्क रहन जरुरी रहेको उनको सुझाव छ ।
