पाकिस्तानको निजी टेलिभिजन च्यानल ‘एक्सप्रेस न्युज’ को प्राइम टक सो मा हानाहान भएको एक भिडियो पाकिस्तानको सोसल मिडियामा भाइरल बनेको छ ।
भिडियो क्लिपमा बहसकै बीच अतिथिबीच कुटाकुट भएको देखिन्छ । पाकिस्तान मुस्लिम लिग-नवाज (पीएमएल)एन का सिनेटर डा. अफनानुल्लाह खान र पाकिस्तान तेहरेक–ए–इन्साफ ९पीटीआई० कोर कमिटी सदस्य एवं अधिवक्ता शेर अफजल खानबीच कार्यक्रमकै बीच हानाहान भएको बीबीसी उर्दुले जनाएको छ ।
कार्यक्रम बुधबार मात्रै रेकर्डिङ गरिएको थियो । सोसल मिडिया प्रयोगकर्ताहरू कुटाकुट घटनाको आलोचना गरिरहेका छन् भने कतिपयले कार्यक्रम सञ्चालककै गल्ती देखाएका छन् । कार्यक्रम वरिष्ठ पत्रकार जावेद चौधरीले होस्ट गरेका थिए ।
भएको के थियो ?
पीएमएल–एनका नेता डा.अफनानुल्लाह र इमरान खानको पार्टी पीटीआईका शेर अफजल आरोप प्रत्यारोप गर्दै एकअर्काको राजनीतिक नेतृत्वको चरित्रमाथि प्रश्न उठाउँछन् । यस क्रममा उनीहरू ठूल्ठूलो आवाज निकाल्छन् । पहिला त उनीहरूबीच वाकयुद्ध मात्र हुन्छ ।
बीचमा एंकर जावेदले स्थिति नियन्त्रणमा लिन प्रयास गरिरहेका हुन्छन् । त्यही बेला अफजल खान आफ्नो सिटबाट उठ्छन् र डा। अफनानुल्लाहलाई चड्कन लगाइदिन्छन् । यसपछि डा. अफनानुल्लाह पनि उठेर जाइलाग्छन् । बुधबार राति भएको रेकर्डिङपछि कार्यक्रमलाई टीभीमा पनि प्रसारित गरियो तर त्यसमा हानाहान भएको हिस्सालाई हटाइएको थियो ।
जावेदको कार्यक्रममा यस्तो झगडा पहिलोपल्ट भएको होइन । यसअघि जुन २०२१ मा तत्कालीन पीटीआई नेता फिरदोस आशिक अवानले पाकिस्तान पिपुल्स पार्टी (पीपीपी) का नेता कादिर मण्डुखेललाई थप्पड हानेका थिए ।
