अछाम- ‘आमाबुबा हाम्रा भगवान् हुन्, उनीहरूलाई स्याहार गरौँ,’ भन्ने सन्देश दिन अछाममा ज्येष्ठ नागरिक सम्मान अभियान सुरु गरिएको छ। ज्येष्ठ नागरिकहरू आफ्नै परिवारबाट अपहेलित भइरहेका घटना बढ्दै गएको वेला उनीहरूलाई घामपानी छेक्न र लौरो टेक्न मिल्ने छाता तथा कम्बल वितरण गरेर अभियान सुरु भएको हो।
सदरमुकाम मंगलसेनमा आयोजित समारोहमा पूर्वश्रम, रोजगार तथा सामाजिक सुरक्षामन्त्री तथा प्रतिनिधिसभा सदस्य शेरबहादुर कुँवर, प्रतिनिधिसभा सदस्य पुष्पबहादुर शाह र सुदूरपश्चिम प्रदेश सभा सदस्य मेघराज खड्काले अभियानको उद्घाटन गरेका हुन्।
जिल्लाका दशवटै स्थानीय तहका जनप्रतिनिधिहरूको उपस्थितिमा गरिएको अभियानको उद्घाटन समारोहमा बोल्दै पूर्वश्रममन्त्री कुँवरले यो अभियानले ज्येष्ठ नागरिकहरूलाई घर, समाज र सरकारबाट सुरक्षासहितको स्याहार दिनुपर्छ भन्ने सन्देश दिने बताए।
समारोहमा बोल्दै अछाम क्षेत्र नम्बर २ बाट निर्वाचित प्रतिनिधिसभा सदस्य पुष्पबहादुर शाहले ज्येष्ठ नागरिकाका लागि राज्यले कैयौँ नियम कानुन बनाए पनि त्यो कार्यान्वयन नहुनु दुःखद भएको बताए। त्यसको कार्यान्वयन गरी यस्ता रचनात्मक अभियानमा हातेमालो गर्न उनले जिल्लाका सबै स्थानीय तहलाई सुझाव दिए।
सुदूरपश्चिम प्रदेश सभा सदस्य मेघराज खड्काले सम्पत्ति कमाएर पनि बाआमाप्रति वास्ता नगर्ने सन्तान बढेको भन्दै चिन्ता व्यक्त गरे। यो समस्या गाउँसहर दुवैतिर देखिएकाले यस्ता अभियानले त्यो प्रवृत्ति अन्त्य गर्न सहयोग पुग्ने उनको विश्वास छ।
अभियानप्रति जिल्ला समन्वय समिति अछामका प्रमुख ललितबहादुर कुँवर, मंगलसेनका नगरप्रमुख पदमबहादुर बोहोरा, साँफेबगरका नगरप्रमुख राजेन्द्रबहादुर कुँवर र ढकारी गाउँपालिकका अध्यक्ष प्रकाशबहादुर साउदले पनि ऐक्यबद्धता जनाएका छन्।
बान्नीगढी जयगढ गाउँपालिकाका उपाध्यक्ष बिन्दु रावल, तुर्माखाँदका उपाध्यक्ष विमला शाही र चौरपाटीका उपाध्यक्ष सरदेवी खड्काले पनि यो अभियान गाउँस्तरमा अझ प्रभावकारी ढंगले कार्यान्वयन गराउने प्रतिबद्धता जनाएका छन्। जिल्लाका दशवटै स्थानीय तहसँगको समन्वयमा गरिने यो अभियानको नेतृत्व अछामको सामुदायिक रेडियो सोसाइटी एफएमले गरिरहेको छ।
अभियानको उद्घाटनमा प्रमुख जिल्ला अधिकारी शरदकुमार पोखरेल, नेपाली कांग्रेसका उपसभापति नयाँराम बजगाईं, नेकपा एमालेका अध्यक्ष चन्द्र बोहोरा, नेकपा माओवादी केन्द्रका प्रदेश सदस्य शिवबहादुर बोगटी, राष्ट्रिय स्वतन्त्र पार्टीका जिल्ला संयोजक ओमप्रकाश रावल, नेकपा एकीकृत समाजवादीका उपसचिव नयन सोडारी, ज्येष्ठ नागरिक जिल्ला संघका अध्यक्ष तेजबहादुर विष्ट, स्वास्थ्य कार्यालय अछामका प्रमुख झनकराज ढुंगाना र अछाम बहुमुखी क्याम्पसका प्रमुख छत्र विष्टलगायतले समेत ज्येष्ठ नागरिक सम्मान अभियानप्रति एकबद्धता जनाएका छन्।
