डडेल्धुरा- प्रधानमन्त्री कप महिला टी २० राष्ट्रिय क्रिकेट प्रतियोगिताको सुदूरपश्चिम प्रदेशस्तरीय छनौटमा डडेलधुरा क्वालिफायर भएको छ। शनिवार सम्पन्न फाइनल खेलमा अछामलाई ७ विकेटले स्तब्ध पार्दै डडेलधुरा च्याम्पियन हुँदै क्वालिफायर भएको हो।
अछामले दिएको ७४ रनको लक्ष्य डडेलधुराले ८.१ ओभरमा ३ विकेटको क्षतिमा भेट्टायो। जसमा प्लेयर अफ द ओम्यान भएकी सुनिता साउँदले अविजित ४७ र निशा खडायले १४ रन जोडिन्। अछामका लागि अस्मिता औजीले २ र कविता सोनारले १ विकेट हात पारिन्।
त्यसअघि अमरगढीस्थित रालिलिला मैदानमा पहिला ब्याटिङ गरेको अछाम १५.१ ओभरमा ७३ रनमा समेटियो । उसका रबिना साउदले १२ र कविता सोनारले ११ रन जोड्नबाहेक अन्य ब्याटरले दोहोरो अङ्कमा रन जोड्न सकेनन् । डडेलधुराका लागि सपना तामाङ र आशिका महराले २/२ विकेट हात पारेका स्कोरर खेमराज भट्टले बताए ।
गत वर्षको प्रदेशस्तरीय छनौट प्रतियोगिताको सेमिफाइनलमा पुग्न नसकेका डडेलधुरा,दार्चुला,डोटी र अछामबिच क्वालिफायर गराइएको सुदूरपश्चिम प्रादेशिक क्रिकेट समितिका उपाध्यक्ष तथा प्रतियोगिता सञ्चालन समितिका संयोजक रमेशबहादुर बोहराले जानकारी दिए ।
यसअघि अन्तिम चारमा पुगेका बैतडी,बझाङ, कैलाली कञ्चनपुरसँगै अब डडेलधुराले प्रदेश छनौट खेल्न पाउनेछ ।प्रदेशस्तरीय छनौट प्रतियोगिता आइतबारदेखि कैलालीको सैनिक आवासीय महाविद्यालयको खेलमैदानमा सुरु हुँदै छ । उद्घाटन खेलमा कैलाली र कञ्चनपुर भिड्दा अर्को खेलमा बैतडी र बझाङबिच प्रतिस्पर्धा हुनेछ ।
फाइनल खेल मङ्सिर २९ गते अङ्कतालिकाको शीर्ष स्थानमा रहने दुई टोलीबिच हुने जनाइएको छ। प्रदेशमा उत्कृष्ट प्रदर्शन गरेर छनौट भएका खेलाडीले टोली बनाएर राष्ट्रिय प्रतियोगिता खेल्नेछन् ।
प्रधानमन्त्री कप महिला टी २० राष्ट्रिय क्रिकेट प्रतियोगिता पुस १ गतेदेखि काठमाडौँमा हुने नेपाल क्रिकेट सङ्घ क्यानका अध्यक्ष चतुर बहादुर चन्दले जानकारी दिए ।प्रतियोगितामा सात प्रदेश र एक विभागीय क्लब एपीएफको सहभागिता रहनेछ।
