काठमाडौं- नेपाल सुपर लिग ९एनएसएल०को दोस्रो संस्करणमा एफसी चितवनविरुद्ध पहिलो हाफमा धनगढी एफसीले १–० को अग्रता बनाएको छ । पहिलो हाफमा पाएको पेनाल्टी सदुपयोग गर्न नसक्दा चितवन १–० ले पछि परेको हो ।

त्रिपुरेश्वरस्थित दशरथ रंगशालामा जारी खेलमा धनगढीका आफिज ओलावालले गोल गर्दै आफ्नो टिमलाई अग्रतामा राखेका हुन् । ओलावालेले खेलको दोस्रो मिनेटमा नै गोल गर्दै धनगढीलाई अग्रता दिलाएका थिए । रोहन कार्कीले राइट साइडबाट निकालेको पासलाई आफिजले पोस्टको दिशा दिएका हुन् ।

पहिलो हाफको इन्जुरी समयमा चितवनले पेनाल्टी पाए पनि त्यसलाई सदुपयोग गर्न नसक्दा खेलमा फर्किन सकेन । १८ यार्ड बक्सभित्र रिचार्ड ओसेईको ह्यान्ड भएपछि चितवनले पेनाल्टी पाएको थियो । तर, त्यसलाई विमल घर्तिमगरले सदुपयोग गर्न सकेनन् । विमलले राइट साइडमा गरेको प्रहारलाई धनगढीका गोलकिपर टेकेन्द्र थापाले विफल बनाएका थिए ।

प्रतियोगितामा धनगढीको यो पाँचौँ खेल हो । आजको खेलमा जित निकाले धनगढी तालिकाको शीर्ष स्थानमा उक्लिने छ । चार खेलबाट आठ अंक जोडेको धनगढी तालिकाको दोस्रो स्थानमा छ । चितवनको भने यो छैटौँ खेल हो । पाँच खेलबाट पाँच अंक जोडेको चितवन तालिकाको सातौँ स्थानमा छ ।