धनगढी- कैलालीको गेटा अस्पतालबाट ९ सय ५१ जनाले स्वास्थ्य सेवा लिएका छन् । गेटा अस्पतालबाट झण्डै २ महिनाको अवधिमा विभिन्न रोगका सो संख्याका बिरामीले स्वास्थ्य सेवा लिएका हुन् ।
हाल उपचारका लागि अस्पतालमा आउने बिरामीको संख्या बढ्दै गएको अस्पतालले जनाएको छ । हाल दैनिक ३० देखि ३५ जनाको हाराहारीमा विरामीले सेवा लिने गरेको अस्पतालका प्रमुख कम्प्युटर अपरेटर भरत जोशीले जानकारी दिए ।
गत कार्तिक १ गतेबाट सेवा सुरु गरेको गेटा अस्पतालमा जनरल फिजिसियन,जनरल सर्जरी,अर्थो,गाइने,रेडियोलोजी,ल्याव एक्सरे,अल्ट्रा साउण्डलगायतका सेवाहरु सञ्चालनमा रहेको गेटा अस्पताले जनाएको छ । साथै अस्पतालले निःशुल्क फार्मेसी सेवा पनि सञ्चालन गरेको छ ।
आगामी दिनमा अन्य सेवाहरु पनि विस्तार गरिँदै लैजाने अस्पतालले जनाएको छ । अहिले केही सेवाहरु सुरु भएको बताउँदै आगामी असारसम्म १ सय बेडको अस्पताल पूर्णरुपमा सञ्चालनमा आउने जोशीले बताए ।
हाल अस्पतालमा ११ जना कन्सलटेन्ट डाक्टरहरु रहेकोमा ९ जना अस्पतालमा उपस्थित रहेको रहेको उनले बताए । सरकारले एक सय शय्याको अस्पताल सञ्चालनका लागि १ सय ४१ जनाको दरबन्दी स्वीकृत गरेको छ । जसमा ३१ जना अधिकृत स्तर र १ सय १० जना सहायक स्तरका कर्मचारी रहेकोमा हाल अस्पतालममा ३० जना कर्मचारी कार्यरत रहेको जनाइएको छ ।
सरकारले गेटामा स्वास्थ्य विज्ञान विश्वविद्यालय स्थापनाको घोषणा गरेको थियो । गेटामा अस्पताल सञ्चालनका लागि सरकारले चालु आवमा चालुतर्फ साढे ३ करोड र पुँजीगततर्फ ८० करोड रुपैयाँ बजेट विनियोजन गरेको छ । चालुतर्फको बजेट १ सय ४१ जना कर्मचारीका लागि पर्याप्त नहुने जोशीले बताए । गेटामा मेडिकल विश्वविद्यालय सञ्चालनका लागि भन्दै पाँच अर्बका भौतिक संरचना निर्माण गरिएका छन् भने केही संरचना निर्माणाधिन अवस्थामा छन् ।
