बाजुरा- बिउरा खोलाको बाढीले बडीमालिका नगरपालिका ९ सेलाघाटको बस्ती जोखिममा परेको छ। शुक्रबार रातीको वर्षाले स्थानीय खहरे खोलाको बाढीले सिंगो सेलाघाट बस्ती नै जोखिममा परेको हो। सेलाघाट बाजुरा जिल्ला सदरमुकाम रहेको नै वडा हो।

बाढीका कारण ३ परिवार पूर्ण रुपमा विस्थापित बनेका छन्। बाढीले स्थानीय चन्दे थापा,अंग थापा र दिपक बिष्टको घरका क्षति पुगेको छ। अन्य २० बढी परिवार जोखिममा परेको स्थानीय मिनबहादुर थापाले बताए।

बाढीले स्थानीय गोपाल थापाको कुखुरा फर्ममा क्षति पुगेको छ। फर्ममा रहेका १ सय ८० कुखुरा मध्ये १ सय ५० बढी मरेका छन्। सयौ मुरि फल्ने खेतमा लगाएको धानबालीमा समेत क्षति पुगेको छ भने सिंगो खेत बगरमा परिणत भएको छ। बाढी राती १ बजेपछि आएको थियो।

बाढी आएको थाहा पाएपछि स्थानीय राती नै घरबाट सरेका थिए। गाउँकै छेउमा वर्षादको समयमा मात्र आउने खहरे खोलाले बस्ती नै जोखिम हुनेगरि बाढी आउने स्थानीयले कल्पना समेत गरेका थिएनन्। खहरे खोलाको बाढीकै कारण साँफे मार्तडी सडक पनि अवरुद्ध भएको छ।

बाउली खोलाको कटानले जोखिममा रहेको बस्ती बिउरा खोलाको बाढीका कारण थप जोखिममा परेको छ। सेलाघाट बस्तीलाई सार्नुको अर्को विकल्प नै देखिएको छैन्। अहिले सबै परिवार सुरक्षित रहेको र अन्यन्त्र बासका लागि प्रबन्धक गर्नु पर्ने प्रहरीले जनाएको छ। बडीमालिका नगरपालिकाको जनप्रतिनिधीको टोली अनुगनमका लागि सेलाघाट पुगेको छ।