बैतडी- प्रधानमन्त्री कप पुरूष एकदिवसीय राष्ट्रिय क्रिकेट प्रतियोगिताको सुदूरपश्चिम प्रदेशस्तरीय छनोटको उपाधि कैलालीले जितेको छ। मंगलवार सम्पन्न फाइनल खेलमा बैतडीलाई ३७ रनले पराजित गर्दै कैलालीले उपाधि रक्षा गरेको हो।

जितका लागि पाएको २८० रनको लक्ष्य पछ्याएको बैतडी ३८ ओभरमा २३२ रनमै समेटियो। जसमा खडक बोहरा र नरेन भट्टले अर्धशतक हिर्काए पनि बैतडीलाई जिताउन सकेनन्। खडक ७४ रन र नरेन ५९ रनमा आउट भए।

कैलालीका कप्तान नारायण जोशीले ३ विकेट, शेर मल्ल र धर्म जोशीले २र२ विकेट हात पारे। यसअघि फाप्ला मैदानमा विहान ९ बजे शुरू हुनुपर्ने ५० ओभरको खेल बाक्लो हुस्सु लागेकाले निर्धारित समयभन्दा ढिला शुरू हुँदा ४० ओभरमा झारिएको थियो।

टस जितेर पहिले ब्याटिङ गरेको कैलालीले निर्धारित ४० ओभरमा ६ विकेट मात्र गुमाएर २७९ रन बनायो। उसका कप्तान नारायण जोशीले शतकीय पारी खेल्दै १०१ रन हिर्काए। शेर मल्लले ५० रनको पारी खेले।

बैतडीका खडक बोहराले ३ विकेट र कप्तान वसन्त खत्रीले २ विकेट झारे। कैलालीका लागि शतक हानेका नारायण खेलका म्यान अफ द म्याच घोषित भए।

विजेता र उपविजेता टोलीलाई सुदूरपश्चिम प्रदेशका सामाजिक विकासमन्त्री झपट साउद, नेपाल क्रिकेट संघका अध्यक्ष चतुरबहादुर चन्द, केन्द्रीय सदस्य धीरेन्द्र सावद, सुदूरपश्चिम प्रादेशिक क्रिकेट संघका अध्यक्ष वासुदेव जोशीलगायतले पुरस्कार वितरण गरे।

पुरस्कार वितरण तथा समापन समारोहमा मन्त्री साउदले सुदूरपश्चिम क्रिकेटको उर्वरभूमि रहेको बताउँदै क्रिकेटको विकास तथा खेलाडीको हौसला र प्रोत्साहनका लागि प्रदेश सरकार प्रतिबद्ध रहेको बताए।

नेपाल क्रिकेट संघका अध्यक्ष चतुरबहादुर चन्दले क्रिकेट खेलले गर्दा नेपाल विश्वमा चिनिएको बताउँदै क्रिकेट विकास र पूर्वाधार निर्माणका लागि सरकारको खाँचो रहेको बताए।

सुदूरपश्चिम प्रादेशिक क्रिकेट संघको आयोजनामा पुस ८ गते शुरू भएको प्रतियोगितामा प्रदेशका ८ जिल्लाको सहभागिता रहेको थियो। प्रादेशिक क्रिकेट संघले एलाइट र प्लेट च्याम्पियनसिप गरेर दुई चरणमा प्रतियोगिता सञ्चालन गरेको हो।

गत वर्षको प्रादेशिक छनोटमा सेमिफाइनल पुगेका बैतडी, अछाम, कैलाली र कञ्चनपुरले एलाइट र दार्चुला, बझाङ, डडेल्धुरा र डोटीले प्लेट च्याम्पियनसिप खेलेका थिए।

प्लेट च्याम्पियनसिपबाट क्वालिफायर भएर बझाङले एलाइट च्याम्पियनसिप खेलेको थियो। यो प्रतियोगिताबाट उत्कृष्ट प्रदर्शन गरेका खेलाडी समेटेर प्रधानमन्त्री कप राष्ट्रिय प्रतियोगिताका लागि सुदूरपश्चिमको टोली घोषणा गरिनेछ।