कैलाली- सुदूरपश्चिम प्रदेशका ३ जिल्लामा आगलागीबाट ११ लाख बराबरको धनमाल जलेर नष्ट हुनुका साथै एक जनाको मृत्यु भएको छ । कैलाली,कञ्चनपुर र डडेल्धुराका विभिन्न स्थानमा भएको आगलागीबाट सो बराबरको धनमाल जलेर नष्ट हुनुका साथै एक जनाको मृत्यु भएको हो ।
कैलालीको गोदावरी नगरपालिका–८ बस्ने टीकाराम जोशीको काठले बनेको १ तले कच्ची घरमा दिउँसो विद्युत मिटर बक्स सर्ट भई अचानक आगलागी हुँदा पाँच लाख ५० हजार बराबरको धनमाल जलेर नष्ट भएको प्रहरीले जनाएको छ । आगो दमकलको सहयोगमा नियन्त्रणमा आएको जनाइएको छ । जिल्लाको जोशीपुर गाउँपालिका–१ बस्ने नन्दन बोहराले संचालन गरेको कुखुरा फर्ममा शुक्रबार दिउँसो सडक किनारामा रहेको विद्युतको पोलबाट अचानक तार सर्ट हुँदा भएको आगलागीबाट फर्ममा रहेका ४ क्विन्टल कुखुरा जलेर अन्दाजी दुईलाख बराबरको क्षती भएको छ ।
भजनी नगरपालिका–२ पल्टुपुर बस्ने कृष्ण बुढाको गहुँ काटेको खेतमा भुसामा आगलागी हुँदा हावाका कारण सोही ठाउँ बस्ने जीतबहादुर विक र रामलखन चौधरीको काठ, खरले बनेको भुईतले कच्ची घरमा शुक्रबार आगलागी हुँदा एकलाख असी हजार बराबरको धनमाल नष्ट भएको छ । त्यस्तैै जानकी गाउँपालिका–९ को पूर्वी खैरीफाँट बस्ने रमेश जैशीको खरले छाएको गाईगोठमा आगलागी हुँदा पचाँस हजार बराबरको धनमाल जलेर नष्ट भएको प्रहरीले जानकारी दिएको छ ।
त्यस्तै कञ्चनपुरको पुनर्वास नगरपालिका–५ बस्ने बाहाली रानाको चार कोठे पक्की घरमा रहेको स्टेप्लाजर सर्ट हुँदा दुईलाख बराबरको धनमाल जलेर नष्ट भएको छ । जिल्लाको शुक्लाफाँटा नगरपालिका–७ बस्ने नरेश ठगुन्नाको एक तले काठले बनेको कच्ची बाख्राको गोठमा आगलागी हुदा एक लाख पचास हजारको धनमाल जलेर नष्ट भएको छ ।
डडेल्धुराको आलिताल गाउँपालिका–५ सिराडी बस्ने अम्बिका सार्कीको ३ कोठे २ तले काठले बनेको खरले छाएको घरमा नजिकै रहेको बालवान सामुदायिक वनमा लागेको आगोले आगलागी हुँदा घरमा रहेका सबै धनमाल जलेर नष्ट भएको जिल्ला प्रहरी कार्यालय डडेल्धुराले जनाएको छ । आगलागीबाट मानवीय तथा चौपायाको क्षती नभएको र अन्य क्षतीको विवरण प्राप्त नभएको प्रहरीले जनाएको छ । डडेल्धुराको नवदुर्गा गाउपालिका–३ बस्ने ६२ बर्षको चन्द्रे चुनारा खेतबारीको घेरबारका लागि झिग्रा काट्ने क्रममा सोही ठाउँ बस्ने दिपकराज उप्रेतीको खरबारीमा लगाएको आगोमा लडी घटना स्थलमा मृत्यु भएको प्रहरी जनाएको छ ।
