अछाम- पर्यटनको प्रचुर सम्भावना बोकेको अछामको रामारोशन क्षेत्रमा पछिल्लो समय आन्तरिक तथा बाह्य पर्यटकको संख्या बढ्न थालेको छ । पर्यटन प्रर्वद्धन र संरक्षणका लागि सुदूरपशिचम प्रदेश सरकारले रामारोशन क्षेत्र पर्यटन विकास बोर्ड गठन गरे सँगै स्थानीय सरकार गुरुयोजना बनाएर अगाडि बढीरहेको छ ।

रामारोशनका ताल तलैया संरक्षण,पर्यटकीय मार्ग निर्माण र तालमा डुङ्गा संचालनका कामहरु थालनी भएको रामारोशन क्षेत्र पर्यटन विकास तथा व्यवस्थापन समितिका कार्यकारी निर्देशक गंगा कुँवरले बताए । अहिले रामारोशनलाई प्रचार प्रसारका रुपमै अगाडि बढाएर विभिन्न तालहरु जाने संकेत बोर्ड, होडिङ्गबोर्ड, पैदलमार्ग रेलिङ्ग सहितको बाटो निर्माण तथा तालमा डुङ्गा संचालन भैरहेको उनको भनाई छ ।
२०८० सालमा ४६ राष्ट्रका नागरिक रामारोशन क्षेत्रमा आएको उनको भनाइ छ ।

अछाम जिल्लाको पुर्वी उत्तरमा पर्ने रामारोशन समुन्द्री सतहबाट दुई हजार ५० मिटर देखि तिनहजार सात सय ९२ मिटर उचाइमा रहेको छ ।
यस क्षेत्रभित्र साना ठुला गरि १२ वटा प्रमुख ताल र १८ वटा पाटन खण्ड रहेका छन । जसलाई १२ बण्ड र १८ खण्डका नामले चिनिन्छ ।
यस क्षेत्रका प्रमुख तालहरु जिंगल्ले, बाठुल्ला, लामिदह, लिस्सेडाली, ताउले, तल्लोधउने, माथिल्लो धउने, गाग्रे, डउठेखाल, दल्याना, रामे र गेराहा रहेका छन ।

रामारोशन क्षेत्र निकै मनमोहक तथा रमाईलो ठाँउ भएकोले यहाँका ताल,पाटन र मैदानले आफ्नो मनै लोभ्याएको काँस्की पोखराका प्रबिण कार्कीले बताए । यतिमात्र नभयर यस क्षेत्रमा पाइने विभिन्न रातो र सेतो गरि आठ प्रकारका गुराँस, जनावर, चराचुरुङ्गी अन्य बहुमुल्य जडिबुट्टी, पत्थरको वैज्ञानिक खोजी तथा अनुसंन्धान हुन सकेको छैन । यसै क्षेत्रमा भिउ टावर, झोलुङ्गे पुल, रक पार्क, रीङ मार्ग समेत निर्माण गरिने हो भने पर्यटकको घुइँचो लाग्ने जानकारहरु बताउँछन । रामारोशन पर्यटन विकास र समृद्धिका लागि लक्ष्य अनुसार अगाडि बढ्ने हो भने सुदूरपश्चिम प्रदेश तथा नेपालकै नमुना सम्पति बन्ने विज्ञहरु बताउँछन ।