धनगढी । काम सानो–ठूलो नभनी निरन्तर मेहनत र संघर्ष गर्दै अघि बढे एक दिन सफलता हासिल गर्न सकिन्छ भन्ने उदाहरण बनेका छन् धनगढी उपमहानगरपालिका–७ बेलीका लोकेश बोहरा।
२०५८ सालमा पत्रिकाको हकरका रूपमा काम सुरु गरेका बोहरा केही समय पत्रकारितामा समेत सक्रिय रहे। तर पत्रकारिताबाट भविष्य नदेखेपछि उनले अन्ततः आफ्नो पेशा परिवर्तन गर्दै खसीबोका तथा बाख्रा खरिद–बिक्री व्यवसायमा हात हाले।
बोहराले सुरुवातमा १२ कट्ठा जमिन भाडामा लिएर साझेदारीमा करिब १० लाख रुपैयाँ लगानी गरी खसीबोका संकलन तथा खरिद–बिक्री फर्म सञ्चालन गरेका थिए। तर साझेदारीको व्यवसाय लामो समय टिक्न सकेन। व्यवसायमा घाटा भएपछि साझेदारले छाडे पनि बोहराले भने हार मानेनन्।

व्यवसाय सुरु गरेको समयमा बोहराका लागि पारिवारिक अवस्था पनि सहज थिएन। एकातिर व्यवसाय घाटामा थियो भने अर्कोतिर श्रीमती क्यान्सरबाट पीडित भएकाले उपचारको जिम्मेवारीसमेत थियो। तर कठिन परिस्थितिका बाबजुद उनले व्यवसायलाई निरन्तरता दिए।
उनका अनुसार कैलालीको भेटेरिनरी अस्पतालबाट दुईपटक गरी करिब ८ लाख रुपैयाँ अनुदान प्राप्त भएपछि खोर निर्माण गर्न सहयोग पुगेको थियो। निरन्तर मेहनत गर्दै जाँदा अहिले व्यवसायले राम्रो गति लिएको उनको भनाइ छ।
करिब १६ वर्षदेखि खसीबोका तथा बाख्राको व्यवसाय गर्दै आएका बोहराले अहिले वार्षिक करिब १ करोड रुपैयाँ बराबरको कारोबार गर्दै आएका छन्। उनका अनुसार यसबाट वार्षिक करिब २५ लाख रुपैयाँ आम्दानी हुने गरेको छ।
अहिले यही व्यवसायबाट पाँच जनाको परिवारको पालनपोषण भइरहेको छ। दुई छोराको पढाइ खर्च पनि यही व्यवसायबाट चलेको छ,” उनले भने।
बोहराका अनुसार व्यवसायबाटै सवारी साधन, घर तथा जग्गा जोड्न सफल भएका छन्। सुदूरपश्चिमका विभिन्न स्थानमा उनले करिब ६० वटा बाख्रा संकलन केन्द्रसमेत सञ्चालनमा ल्याएका छन्।

दैनिक करिब ६० वटा खसीबोका तथा बाख्रा खोरमा भइरहन्छन्   बोहराले  भने दशैंलाई लक्षित गरेर यस वर्ष करिब ४०० वटा खसीबोका बिक्री गर्ने लक्ष्य राखिएको जानकारी दिए।
उनका अनुसार उनको फर्मबाट सुदूरपश्चिमका ९ वटै जिल्लासहित काठमाडौं तथा पूर्वी नेपालका विभिन्न जिल्लामा समेत खसीबोका जाने गरेका छन्।
खसीबोका खरिद–बिक्रीसँगै बोहराले अहिले उन्नत जातका बाख्रा उत्पादनतर्फ समेत ध्यान दिएका छन्। उनले विभिन्न जातका चार वटा बोका खरिद गरेर ल्याएका छन्। एउटा बोकाको मूल्य करिब १ लाख रुपैयाँसम्म परेको उनले बताए।
भारतको राजस्थानबाट तातोपारी र जमुनापारी जातका बोका तथा बुढीतोला बाख्रा फर्मबाट बयर जातको बोका ल्याएर उन्नत जातका बाख्रा उत्पादन गर्ने तयारीमा रहेको उनको भनाइ छ।
भारतीय बजारको असर
बोहराले नेपाली किसान तथा व्यवसायीलाई प्रोत्साहन गर्न राज्यले स्पष्ट नीति बनाउनुपर्ने आवश्यकता रहेको बताए।
पहिला नाकामा कडाइ हुँदा हामीजस्ता किसान तथा व्यवसायीलाई राम्रो भइरहेको थियो। अहिले फेरि भारतीय बजारको प्रभाव बढेको छ,” उनले भने, “नेपालमा उत्पादन भएका खसीबोका सस्तो मूल्यमा भारत लैजाने क्रमले हामीलाई निकै समस्या भइरहेको छ।”
स्थानीय उत्पादनलाई संरक्षण गर्ने गरी सरकारले नीति बनाउनुपर्ने उनको माग छ।
बोहरा आफूले भोगेको संघर्षबाट नयाँ पुस्ताले पनि सिक्नुपर्ने बताउँछन्। उनका अनुसार व्यवसायमा समस्या आउँदैमा तथा घाटा हुँदैमा हरेस खानु हुँदैन।
“काम सानो–ठूलो नभनी निरन्तर संघर्ष गर्न सके एक दिन सफलता हात लाग्न सक्छ। मलाई समस्या भयो, घाटा भयो भन्दैमा व्यवसाय छोडेको भए आज यहाँसम्म पुग्ने थिइनँ,” उनले भने।
आफ्नै देशमा मेहनत र श्रम गर्न सके आत्मनिर्भर बन्न सकिने उनको विश्वास छ। “अन्य देशमा गएर मेहनत गर्नुभन्दा आफ्नै भूमिमा त्यही श्रम र सीप लगाउन सके एक दिन सफलता हासिल गर्न सकिन्छ,” बोहराले भने।