धनगढी- कैलालीको धनगढीस्थित सेती प्रादेशिक अस्पतालले एमआरआई सेवा सुरु गरेको छ । अस्पतालले आइतबारबाट एमआरआई सेवा सुरु गरेको हो ।
एमआरआई सेवा सुरु भएसँगै बिरामीले बढी शुल्क तिरेर निजी अस्पतालमा एमआरआई गर्नुपर्ने बाध्यता कम हुने अस्पतालको दाबी छ ।
सेती प्रादेशिक अस्पतालका प्रमुख मेडिकल सुपरिटेन्डेन्ट डा.शेरबहादुर कमरले यसअघि परीक्षणको रुपमा एमआरआई सुरु भएको भएपनि आइतबारबाट पूर्णरुपमा एमआरआई सेवा सुरु भएको बताए ।
‘एमआरआई सेवा सुरु भएसँगै यहाँका धेरै बिरामीलाई सहज हुनेछ । शुल्क पनि बाहिरको भन्दा धेरै कम हुन्छ ।’ उनले भने ‘यहाँ भण्डै ६० प्रतिशत कम शुल्क हुन्छ । बिरामीले महंगो शुल्क तिरेर बाहिर एमआरआई गर्नुपर्ने बाध्यता पनि हट्छ ।’ यहाँका सरकारी अस्पतालमा एमआरआई सेवा नहुँदा बिरामीले महंगो शुल्क तिरेर निजी अस्पतालमा एमआरआई गर्नुपर्ने बाध्यता थियो ।
स्वास्थ्य बीमा गराएकाले एमआरआई गर्नु परे अलग्गै शुल्क नलाग्ने उनको भनाइ छ । एमआरआईबाट शरीरमा लागेको चोटपटक, क्यान्सर, स्नायु, टाउकोलगायतका विभिन्न अङ्ग र तन्तुको अवस्था पत्ता लगाउन सजिलो हुने उनले बताए । उनले मेसिन गत वर्ष नै आईसकेको भएपनि जडानमा ढिलाई हुनुलगायतका कारणले अहिले सञ्चालनमा आएको बताए ।
भण्डै डेढ वर्ष अगाडि सञ्चालनमा आएको सिटीस्क्यान सेवाबाट पनि धेरै बिरामी लाभान्वित भइरहेको डा. कमरले बताए । पछिल्लो समय सेती प्रादेशक अस्पतालले सेवा विस्तारलाई प्राथमिकता दिँदै आएको छ । हाल सेती अस्पतालमा एक सय २५ शय्याको स्वीकृति भएपनि बिरामीको चापले गर्दा ३ सय शय्या सञ्चालन भइरहेको उनले बताए ।
