धनगढी- जिल्ला प्रहरी कार्यालय कैलालीले लागुऔषध मुद्धामा तीन सय ९२ जनालाई पक्राउ गरेको छ । चालु आव २०८०÷८१ को १० महिनामा उक्त सङ्ख्याका लागुऔषध प्रयोगकर्ता तथा कारोबारीलाई पक्राउ परेका हुन् ।
साउनदेखि वैशाख मसान्तसम्मको अवधिमा लागुऔषध मुद्धामा २४ महिला र तीन सय ६८ पुरुष पक्राउ परेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक कबिन्द्रसिंह बोहराले जानकारी दिए । उनका अनुसार सो अवधिमा पक्राउ परेकाहरुको साथबाट ३१ किलो पाँच सय ३१ ग्राम चरेश,दुई सय ८१ ग्राम २९ मिलिग्राम खैरो हिरोईन, ८५ ट्याब्लेट नाईट्रोभेट, दुई सय ३० ट्याब्लेट स्पास र ९६ प्रिगाभा बरामद गरिएको छ । सो अवधिमा लागुऔषधका दुई सय ७५ मुद्धामा दर्ता भएको उनले जानकारी दिए ।
‘जनचेतनाको कमी,अशिक्षा,खुला सीमानाका कारण भारतबाट सहजरुपमा पाउन सकिने भएकाले प्रयोग र कारोबारमा लागेको पाइएको छ’, उनले भने, ‘प्रहरी सक्रियरुपमा लागेको छ । खुला सीमानाले गर्दा नियन्त्रण गर्न गाह्रो भएको छ ।’ प्रहरी नायव उपरीक्षक बोहराले भने, ‘हामीले स्थानीय तहसँग समन्वय गरेर ठाउँठाउँमा जनचेतनामुलक कार्यक्रम पनि गरिरहेका छौँ । यसमा मान्छे स्वयं आफै सचेत हुन जरुरी छ ।’
जिल्ला प्रहरी कार्यालयबाट हाल मुद्धा चलिरहेकामध्ये ६० प्रतिशत लागुऔषध मुद्धा रहेको उनको भनाइ छ । लागुऔषध मुद्धामा पक्राउ परेका अधिकांश किशोरावस्था र युवावस्थाका रहेका छन् ।
गत आव २०७९÷८० मा तीन सय ४७ लागुऔषध मुद्धामा चार सय ७३ जना पुरुष र ४९ जना महिला गरी जम्मा पाँच सय २२ जना पक्राउ परेकोे जिल्ला प्रहरी कार्यालय कैलालीको तथ्यांक छ ।
