धनगढी । सुदूरपश्चिम प्रदेशका शिक्षा,युवा तथा खेलकुदमन्त्री लक्ष्मी विकले शिक्षाको गुणस्तर सुधारका लागि तीनै तहका सरकार जिम्मेवार बन्नुपर्ने धारणा राखेकी छन् ।
आइतबार शिक्षा विकास निर्देशनालयले धनगढीमा आयोजना गरेको माध्यमिक शिक्षा परीक्षा (एसइई) २०८० को प्रदेशस्तरीय समिक्षा र परीक्षा सञ्चालन तथा व्यवस्थापन सम्बन्धी अभिमुखिकरणमा बोल्दै उनले यस्तो धारणा राखेकी हुन् ।
उनले भनिन् ‘सरकारले शिक्षामा ठूलो लगानी गरेको छ । एसइईको नतिजा कमजोर आएको छ । नीतिगत कुरामा हामी कहाँ चुक्यौँ । स्थानीय,प्रदेश र संघ सरकारले एक अर्कालाई दोषारोपण गर्नुभन्दा सबै जिम्मेवार बन्न आवश्यक छ ।’
मन्त्री विकले शिक्षामा नीतिगत सुधारको पनि आवश्यक रहेको बताइन् । ‘हामीले शिक्षाको नीति पनि समयानुकुल बनाउन सकेका छैनौँ’, उनले भनिन् ‘पुरानै शिक्षा नीतिमा चलिरहेका छौँ । यतातिर पनि बहस गर्न आवश्यक छ ।’ ‘नीतिगत सुधारका लागि साझा अवधारणा बनाएर अगाडि बढ्दा उपयुक्त हुन्छ । यहाँका ८८ वटै स्थानीय तहमा बहस गर्न जरुरी छ’,उनले भनिन् ।
शिक्षा क्षेत्रमा प्रदेश सरकारको सहयोगमा कुनै कमी नहुने उनले बताइन् । उनले भनिन् ‘म मन्त्री रहे पनि नरहे पनि शिक्षा क्षेत्रका लागि आफूले गर्न सक्ने सहयोगमा कुनै कमी हुँदैन् ।’
सुदूरपश्चिम प्रदेशका प्रमुख सचिव डा.हरिप्रसाद लम्सालले शैक्षिक गुणस्तर सुधारका लागि आगामी योजना बनाएर जानुपर्ने बताए ।
उनले भने ‘सुधार गर्न सकिने ठाउँमा सुधार गरौँ । धेरै सैद्धान्तिक कुरामा नजाउँ । यस उसले गर्दा नतिजा राम्रो आएन भन्नुभन्दा पनि अब कसरी जान सकिन्छ भन्नेमा छलफल गरेर अगाडि बढ्नुपर्छ ।’
शिक्षा विकास निर्देशनालयका निर्देशक दुर्गादत्त विष्टको अध्यक्षतामा भएको कार्यक्रममा शिक्षा विकास अधिकृत कृष्णबहादुर महराले सुदूरपश्चिम प्रदेशमा माध्यमिक शिक्षा परीक्षा (एसइई)को वर्तमान अवस्था र सुधारका प्रयासका विषयमा प्रस्तुतिकरण राखेका थिए ।
