धनगढी- सुदूरपश्चिम प्रदेशका शिक्षा,युवा तथा खेलकुद मन्त्री लक्ष्मी विकले खेलका माध्यमबाट सुदूरपश्चिमलाई राष्ट्रिय तथा अन्तर्राष्टिय क्षेत्रमा चिनाउन खेलाडीको महत्वपूर्ण भूमिका रहने बताएकी छन् ।
नेपाली ओलम्पियन खेलाडीहरुको छाता संगठन नेपाल ओलम्पियन्स यसोसियसनको समन्वय तथा सुदूरपश्चिम प्रदेश खेलकुद परिषद्को आयोजनामा सोमबार महेन्द्रनगरमा आयोजित ‘स्कुल टु ओलम्पिक’ कार्यक्रममा बोल्दै उनले यस्तो बताएकी हुन् ।
उनले भनिन् ‘यहाँका खेलाडीले सुदूरपश्चिमलाई देश र विदेशमा चिनाउने काम गर्नुभएको छ । यो खुशीको कुरा हो । सात जना ओलम्पिकसम्म पुग्नु भएको छ । हाम्रा लागि गौरवको विषय हो ।’
‘उहाँहरुले खेल क्षेत्रबाट सुदूरपश्चिलाई स्थापित गर्नुभएको छ’ उनले भनिन् ‘खेलकुद क्षेत्रको विकासका लागि प्रदेश सरकार गम्भीर छ । सरकारको तर्फबाट गर्न सक्ने सहयोगमा कमी रहने छैन् ।’
कार्यक्रममा तेक्वान्दोका ओलम्पियन्स दीपक बिष्ट,बोक्सिङका ओलम्पियन्स बिष्णुबहादुर सिंह र बोक्सिङका ओलम्पियन्स डम्बरदत्त भट्टले आफ्नो विद्यालयदेखि ओलम्पिकसम्मको यात्राका बारेकामा अनुभव साटासाट गरेका थिए । कार्यक्रमा झण्डै ३५ वटा विद्यालयका विद्यार्थीहरुको उपस्थिति रहेको थियो ।
मन्त्री विकले कार्यक्रममा ओलम्पियन्स बिष्ट,सिंह र भट्टलाई सम्मान समेत गरेकी थिइन् ।
मन्त्री विकले महेन्द्रनगरमा निर्माणाधिन कभर्डहलको निरीक्षण पनि गरकी थिइन् ।
