धनगढी नमुना प्राविधिक माध्यामिक विद्यालयको शैक्षिक गुणस्तर लगायत समग्र विषयमा प्रधानाध्यापक लक्ष्मण दत्त भट्टको विचार प्रस्तुत गरेका छौँ । 

कैलाली धनगढी उपमहानगरपालिका–८ स्थित धनगढी नमुना प्राविधिक माध्यमिक विद्यालयको स्थापना २००४ सालमा भाषा विद्यालयको रुपमा भएको थियो । यो विद्यालय जिल्लाकै जेठो विद्यालय हो । २०३४ सालमा निम्न माध्यमिक तहमा स्तरोन्नति भएको थियो । २०४० सालमा माविको स्थायी स्विकृति पाएको हो ।

२०४० सालमा पहिलो पटक यस विद्यालयबाट विद्यार्थीहरु एसएलसीमा सहभागी भएका थिए । २०६३/६४ सालतिर कक्षा ११/१२ को उच्च माध्यमिक शिक्षा परिषद्बाट स्विकृति ल्याएर पढाइ सुरुभएको हो । बेरोजगार मात्रै कति उत्पादन गर्नु हुँदैन् । स्वरोजगार जनशक्ति उत्पादन गर्नु पर्छ । आफैले केही गरिखाने बनाउनु पर्छ । प्राविधिक धारको ज्ञान दिनु पर्छ भनेर २०७४ सालमा प्राविधिक धारको शिक्षा सञ्चालन गर्यौँ ।
यसपालि हाम्रो विद्यालयमा विज्ञान बिषय पढ्न आउने विद्यार्थीलाई पूर्ण छात्रवृति पढाउने योजना छ । यस विद्यालयलाई ४० जनाको कोटा छ । सबैलाई निःशुल्क पढाउने हाम्रो योजना हो । पहिलो पटक विज्ञान विषय धनगढीमा हामीले निःशुल्क पढाउँदै छौँ । नमूना विद्यालयले विज्ञान बिषयमा गुणस्तरीय पढाइ सञ्चालन गर्नुपर्छ भनेर सरकारले नीति ल्याएको छ । त्यसका लागि सहयोग हुन्छ भन्ने हामीले आश्वासन पाएका छौँ । सरकारले दिएपनि नदिए पनि विज्ञान विषय निःशुल्क पढाउँछौँ ।

सिभिल इन्जिनियरको पढाइ सञ्चालनमा ल्यायौँ । अहिले यस विद्यालयबाट सिभिल इन्जिनियरका ४ वटा व्याचले कक्षा ११ र १२ पास गरिसकेका छन् । अहिले पनि पठनपाठन भइरहेको छ । कक्षा ११/१२ मा कानून पढ्न चाहनेका लागि त्यो पनि व्यवस्था छ । विज्ञान,शिक्षा,मानविकीलगायत ६ वटा विषयको पढाइ यहाँ हुन्छ ।

पछिल्ला दिनमा २०७५ सालमा नमूना विद्यालयमा छनोट भइसकेपछि विभिन्न गतिविधि सञ्चालन गर्दै आएका छौँ । पाठ्यक्रममा निर्धारित उदेश्य बाहेकका अतिरिक्त शिक्षा दिने गरेका छौँ । पाठ्यक्रममा मात्रै सीमित छैनौँ । त्या भन्दा बाहिर गएर विद्यार्थीको ज्ञान,सीप अभिवृद्धि गर्नुका साथै प्रविधियुक्त विद्यार्थी बनाउने प्रयासमा छौँ ।

हाम्रो विद्यालयमा अध्ययन गरेर गएका विद्यार्थी थुप्रै ठाउँमा सफल पनि भएका छन् । यस विद्यालयको पहिलो व्याचमा एसएलसी दिएका डा.हेमसागर बराल नेपालको एक मात्रै चरा विशेषज्ञ हुन् । सोही व्याचका रतन बाग्चन पुनरावेदन अदालतका न्यायाधिस र शिवराज ओझा भौतिक पुर्बाधार विकास मन्त्रालयमा लेखा अधिकृत हुनुहुन्छ ।

थुपै विद्यार्थीले राम्रै प्रगति गरेका छन् । हाम्रै विद्यार्थी स्थायी शिक्षक भएर यही आएका छन् । यहाँ सिभिल इन्जिनिय पढेकाले स्थानीय स्तरमै रोजगारी आवद्ध भएका छन् । पछिल्लो समय शैक्षिक गुणस्तरमा हामीले सुधार ल्याएको महसुस भएको छ ।

सम्बन्धित सबै सरोकारवालाको साथ सहयोगले गर्दा यस विद्यालयमा विद्यार्थीको आकर्षण बढेको देखिन्छ । यो वर्ष झण्डै १८ सय विद्यार्थी यहाँ अध्ययनरत छन् । ७१ जना शिक्षक,कर्मचारी छौँ । ३६ कोठे भवन गत वर्षबाट सञ्चालनमा ल्याएका छौँ । भौतिक पूर्वाधारको क्षेत्रमा पनि राम्रै रहेका छ । अझै यहाँको शैक्षिक गुणस्तर सुधारका लागि कार्य गरिरहेका छौँ ।

यस विद्यालयमा जसले जुन बिषय पढ्न चाहन्छन् सबै पढाइ हुन्छ । यो विदालय गुणस्तरीय शिक्षा दिन समर्पित छ । सबै योग्य शिक्षकले अध्यापन गरिरहनुभएको छ । त्यसैले सफलता पनि पाएका छौँ । अभिभावकले विश्वास गरेर पढाउन पठाउनुभयो भने राम्रो नागरिक बनाएर पठाउँछौँ भन्न पनि चाहान्छु ।