धनगढी- नोभा हस्पिटलमा भएको तनावलाई निष्कर्षमा पुर्याउन दुईटै पक्ष छलफलमा बसेका छन । अहिले तनाव सामान्य हुँदै गएको छ र अस्पताल प्रशासन र पीडित पक्षको कुराकानी भइरहेको जिल्ला प्रहरी कार्यालय कैलालीका प्रहरी निरीक्षक गंगादत्त वडूले निशाना न्युजलाई जानकारी दिए ।
नोभा हस्पिटलको लापरवाहीको कारणले कञ्चनपुरको बेलौरीका १७ वर्षीय नसिब चौधरीको मृत्यु भएको भन्दै आफन्तले अस्पताल तोडफोड गरेका थिए । पीडित पक्षले उचित क्षतिपूर्ति र उपचारमा संलग्न डाक्टरलाई कार्वाही गर्नुपर्ने माग गर्दै आन्दोलनमा उत्रेका थिए । केहिबेर तोडफोडमा उत्रेका प्रदर्शनकारीले अस्पतालको अगाडिको भागका सिसा फुटाएका थिए । स्थिती नियन्त्रणमा लिन प्रहरीले अश्रुग्याँस हान्नु परेको प्रहरी निरीक्षक बडूले वताए । प्रदर्शनको क्रममा कञ्चनपुरको बेलौरी नगरपालिका–२ का अभिक बुढा र लक्ष्मण बुढा घाइते भएका छन् । घाइतेको धनगढीस्थित सारथी अस्पतामा उपचार भैरहेको छ ।
जन्डिसको समस्या लिएर ७ साउनमा नोभा हस्पिटल भर्ना भएका चौधरीको शुक्रबार दिउँसो नेपालगञ्ज लैजान एम्बुलेन्समा राख्ने क्रममा मृत्यु भएको थियो । अस्पतालले उपचारमा लापरवाही गरेका कारण उनको मृत्यु भएको भन्दै आफन्तले शव बुझ्न मानेका छैनन् । तर नोभा अस्पतालले अस्पताको लापारवाहीले बिरामीको मुत्यु भएको भन्ने कुरामा सत्यता नभएको जनाएको छ ।
मृतकका आफन्तले उचित क्षतिपूर्ति र उपचारमा संलग्न डाक्टरलाई कारवाही गर्नुपर्ने माग गरेका छन् । हस्पिटलले शुक्रबार साँझ मृतकका आफन्तसँग वार्ता गरेको थियो तर उनीहरूले जिम्मेवार व्यक्ति वार्तामा आउनुपर्नेमा नर्स पठाइएको भन्दै बहिष्कार गरेका थिए । सुरक्षालाई मध्यनजर गर्दै अस्पतालमा प्रहरीले पहरा दिइरहेको छ भने मृतकका आफन्त समेत अस्पताल बाहिर भेला भएका छन् ।
