धनगढी- कैलालीमा स्थायी बन्ध्याकरण गर्ने महिलाको तुलनामा पुरुषको सङ्ख्या न्यून रहेको छ । स्वास्थ्य कार्यालय कैलालीको पछिल्ला तीन वर्षको तथ्याङ्कअनुसार स्थायी बन्ध्याकरण गर्नेमा पुरुषभन्दा महिलाको सङ्ख्या निकै बढी रहेको हो ।
स्वास्थ्य कार्यालय कैलालीका परिवार नियोजन सुपरभाइजर निरीक्षक ओलटनारायण चापागाईँका अनुसार पछिल्ला तीन आर्थिक वर्षमा सन्तानको इच्छा पुगेका सात सय ७५ जनाले स्थायी बन्ध्याकरण सेवा लिएका छन् ।
जसमा स्थायी बन्ध्याकरण सेवा लिने महिलाको सङ्ख्या छ सय ८१ र पुरुषको सङ्ख्या ९४ जना रहेको उनले जानकारी दिए ।
आर्थिक वर्ष २०७८/७९ मा दुई सय ३८ जनाले स्थायी बन्ध्याकरण सेवा लिएकामा महिला एक सय ९८ र पुरुष ४० जना ,आर्थिक वर्ष २०७९/८० मा दुई सय ९१ जनाले सेवा लिएकामा महिला दुई सय ६३ र पुरुष २८ तथा गत आर्थिक वर्ष २०८०/८१ मा दुई सय ४६ जनाले स्थायी बन्ध्याकरण सेवा लिएकामा महिला दुई सय २० र पुरुष २६ रहेका सुपरभाइजर निरीक्षक चापागाईँले जानकारी दिए ।
‘तीन वर्षको तथ्याङ्कमा हरेक वर्ष स्थायी बन्ध्याकरण गर्नेमा महिलाको सङ्ख्या नै बढी देखिन्छ’, उनले भने ‘पुरुषले स्थायी बन्ध्याकरण गर्न नचाहने,महिलाहरुले नै पुरुषलाई बन्ध्याकरण गर्न नदिने जस्ता कारणले बन्ध्याकरणमा पुरुषभन्दा महिलाको सहभागिता बढी भएको देखिन्छ ।’
‘पुरुषले भ्यासेक्टोमी गर्दा शरीरमा अप्ठ्यारो हुन्छ भन्ने भ्रम पनि छ’, उनले भने,–‘पुरुष मान्छेले धेरै काम गर्नु पर्छ,बन्ध्याकारण गर्दा कमजोर भइन्छ भन्ने जस्ता भ्रमले गर्दा पनि स्थायी बन्ध्याकरणमा पुरुषभन्दा महिला बढी आकर्षित देखिन्छन् ।’
स्वास्थ्य कार्यालयले जिल्लाका विभिन्न ठाउँमा घुम्ती शिविरमार्फत हरेक वर्ष स्थायी बन्ध्याकरण सेवा दिने गरेको उनको भनाइ छ । परिवार नियोजनको स्थायी बन्ध्याकरण मिनिल्याप महिला र भ्यासेक्टोमी पुरुषले गर्ने गरेका छन् ।
