धनगढी – ठाउँ ठाउँमा पहिरोले सडक अवरुद्ध भएपनि बाजुराको स्याउ कर्णाली र लुम्बिनी प्रदेश घुम्दै धनगढी आइपुगेको छ ।

स्वामिकार्तिक गाउँपालिका वडा नं. १ का किसान धन रावलले स्वामिकार्तिकबाट कालिकोट, सुर्खेत, कोहलपुर हुँदै ६८ क्वीन्टल स्याउ धनगढी ल्याएर विक्री गरिरहेका हुन् । उनले ठाउँ ठाउँमा पहिरो गएर बाटो बन्द भएपछि मार्तडी–कोल्टी–पिलुचौर हुँदै स्वामीकार्तिक गाउँपालिकासम्म सवारीसाधन चल्न सकेकोले कर्णाली प्रदेशको बाटो रोज्नु परेको बताए । घुमाउरो बाटो र मानिसद्वारा ढुवानी गर्न परेकाले बाजुराका किसानलाई ३५ देखि ४५ रुपैयाँ तिरेर ल्याइएको स्याउको मुल्य उपभोक्तालाई १२० रुपैयाँ पर्ने गरेको छ ।

स्वामिकार्तिक गाउँपालिकाका स्याउ किसान तथा व्यापारी प्रेम कट्टेलले बाटो बारीमै स्याउ कुहिन थालेको किसान बताए । उनले तल्लोभेगमा उत्पादन भएको स्याउ सकिएको बताउँदै माथिल्लो भेगमा फलेका स्याउ निकाल्ने बेलासम्म बाटोको पहिरो नहटाइएकोले स्याउ ढुवानीमा समस्या भएको बताए । उनले बाटो नबनेकै कारण ट्रक जान सक्ने ठाउँसम्म लेबर लगाएर स्याउ ढुवानी गरेको बताए ।

उनले प्रति कार्टुन स्याउ ढुवानीका लागि ५० रुपैयाँ ज्याला दिएर बाजुराबाट कालीकोट, सुर्खेत हुँदै नेपालगञ्ज, धनगढी, काठमाडौं लगायतका ठाउँमा स्याउ पठाइरहेको बताए । उनले बारीदेखि नै मानिसलाई बोकाएर ढुवानी गर्नु परेकाले उपभोक्तासम्म पुग्दा मुल्य बढेको बताए ।

हरेक वर्ष बाजुराको स्याउ ढुवानी र ग्रेडिङ्गमा सहयोग गर्दै आएको कृषि ज्ञान केन्द्र बाजुराले बजेट ढिलो पारित भएको हुँदा किसानलाई कुनै सहयोग गर्न सकेको छैन । बाजुराकै किसान सहबीर विकले यसपाली स्याउ ढुवानीमा सरकारी सहयोग नपाइएको बताए । उनले प्रधानमन्त्री कृषि आधुनिकरण परियोजनाले स्याउ जोन बाजुराको स्याउ प्याकिङ्गको लागि कार्टुन सहयोग गरेको बताए ।