धनगढी- कैलाली भन्सार कार्यालय धनगढीको राजस्व संकलन लक्ष्यमा पुग्न सकेन् । चालु आव २०८१/८२ का तीन महिनाको राजस्व संकलन लक्ष्यमा पुग्न नसकेको हो ।
चालु आवको श्रावणदेखि असोजसम्मका तीन महिनामा कुनै पनि महिना राजस्व संकलन लक्ष्यमा पुगेको छैन् । कार्यालयको चालु आवको श्रावण महिनामा ८२ करोड ९४ लाख राजस्व संकलनको लक्ष्य रहेकामा ५७ करोड ५० लाख अर्थात ६९ दशमलव ३३,भदौमा ९० करोड ८३ लाख लक्ष्य रहेकोमा ५३ करोड ८४ लाख अर्थात ५९ दशमलव २८ प्रतिशत र असोजमा ८७ करोड ६१ लाख लक्ष्य रहेकामा ६७ करोड २४ लाख अर्थात ७६ दशमलव ७५ प्रतिशतमात्रै राजस्व संकलन भएको सूचना अधिकारी पवित्रकुमार खड्काले जानकारी दिए ।
चालु आवमा कार्यालयको राजस्व संकलनको वार्षिक लक्ष्य ११ अर्ब १६ करोड २६ लाख रहेकामा ३ महिनामा १ अर्ब ७८ करोड ६० लाख संकलन भएको उनले बताए । जुन वार्षिक लक्ष्यको १६ प्रतिशत रहेको छ ।
भन्सार कार्यालयले गत आव २०८०/८१ मा ७ अर्ब ९१ करोड ८० लाख राजस्व संकलन गरेको थियो । ११ अर्ब ५८ करोड २४ लाख राजस्व संकलनको वार्षिक लक्ष्य रहेकोमा लक्ष्यको ६८ दशमलव ३६ प्रतिशत मात्रै राजस्व संकलन भएको कैलाली भन्सार कार्यालयले जनाएको छ ।
