कैलाली । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरिया कैलालीले गत आर्थिक वर्ष २०८१/८२ मा सवारी कारवाहीबाट ४ करोड ४१ लाख ५१ हजार राजस्व संकलन गरेको छ । ६१ हजार ५७६ सवारी साधन कारवाहीबाट सो राजस्व संकलन गरेको हो ।
अघिल्लो आर्थिक बर्ष २०८०।०८१ मा ७३ हजार ४७९ सवारी साधन कारवाही गरिँदा ४ करोड ८९ लाख ८७ हजार राजस्व संकलन गरिएको कार्यालयका प्रमुख एवं प्रहरी उपरीक्षक प्रेमबहादुर शाहीले निशाना न्युजलाई जानकारी दिए ।

उनले आर्थिक बर्ष २०८१।०८२ मा एक हजार २०३ सवारी दुर्घटना हुँदा १९२ जनाको मृत्यु भएको बताए । सवारी साधन दुर्घटनाबाट १४२ पुरुष , ३३ महिला, १२ बालक र ५ बालिकाको मृत्यु भएको उनले बताए । आर्थिक बर्ष २०८०।८१ मा ३०९ सवारी साधन दुर्घटना भएका र दुर्घटनामा १७२ जनाको मृत्यु भएको उनको भनाइ छ ।

गत आर्थिक बर्षमा दुर्घटनामा संलग्न सवारी साधनमा ट्रक ट्याङ्कर ५०,टिप्पर १९,डोजर ८,बस ५६, माईक्रो ४७,जिपकार १५०,ट्याक्टर ७९,टेम्पो ७२,मोटरसाइकल १ हजार २९, शारीरिक शक्तिबाट चल्ने १५७ र अन्य ५९ गरी जम्मा एक हजार ७२६ सवारी साधन रहेको उनले बताए ।

गत आर्थिक वर्ष २०८१।८२ मा तीब्र गतिले ७५२, मादक पदार्थ सेवनले १३६, ओभरटेकले ३२,मेकानिकल कारणले ५५,सडक/मौषमका कारण २६,चौपायाका कारण १९ र अन्य कारणले १८३ साधन दुर्घटनामा परेको उल्लेख छ ।

त्यस्तै,अघिल्लो आर्थिक वर्ष २०८०।८१ मा तीब्र गतिले १८४,मादकपदार्थ सेवनले २४,ओभरटेकले १२,मेकानिकल कारणले २२ ,सडक/मौषमका कारण १५,चौपायाका कारण २१ र अन्य कारणले ३१ सवारी साधन दुर्घटनामा परेको कार्यालयको तथ्यांकमा उल्लेख छ । चालक संग १ मिनेट कार्यक्रम अन्तरगत ५ हजार ९१३ पटक कार्यक्रम गर्दा दुई लाख ६ हजार १४९ जना चालक र सहचालक लाभान्वित भएको प्रहरी उपरीक्षक शाहीले बताए ।

स्कुल सम्पर्क कार्यक्रम अन्तरगत ३०१ पटक कार्यक्रम गर्दा २१ हजार ४२९ विद्यार्थी लाभान्वित भएका छन् । त्यसैगरी अभिभावकसँग ट्राफिक प्रहरी कार्यक्रम अन्तरगत ४८३ पटक कार्यक्रम गर्दा ९ हजार ९९९ जना अभिभावक लाभान्वित भएको उनको भनाइ छ ।

‘प्रत्येक हप्ताको शुक्रबार मादक पदार्थ तथा लेन अनुशासन सम्बन्धी जनचेतनामुलक कक्षा संचालन कार्यक्रम ५२ पटक गरेका थियौँ’ उनले भने ‘सोबाट एक हजार ५४३ जना लाभान्वित भएका छन् ।’ पहाडी रुट गोदावरीदेखि बुडर र बुडर देखी स्याउलेसम्म टाईम कार्डलाई कडा रुपमा लागु गरिएको र अत्तरिया पोष्टबाट भाडाका यात्रु बाहक बसहरुमा २ जना चालक भए नभएको टिसिए एपको प्रयोग गरी चेकजाचलाई निरन्तरता दिएको उनले बताए ।

पहिलोपटक २०८१ चैत १३ गतेदेखि ट्रेक्टर बहस कार्यक्रम संचालन गरिएको,सुदूरपश्चिम प्रदेशका ९ जिल्लाहरुमा हाल सम्म ट्राफिक प्रहरी र जनपद प्रहरीद्वारा संयुक्त रुपमा ६४ पटक कार्यक्रम संचालन गरी सो कार्यलाई पनि निरन्तरता दिएको उनले बताए ।

उनले भने ‘ट्याक्टर र अटोमा रिफ्लेक्टिभ स्टिकर टाँस गर्ने कार्यलाई निरन्तरता दिइएको छ जसमा दुई हजार ९९० सवारी साधनहरुमा टाँस गरिएको छ ।’ तीब्र गतिलाई निरुत्साहित गर्न लिडार स्पिड गनको प्रयोग भइरहेको र सोको माध्यमबाट १४८ सवारी साधनलाई कारवाही गरिएको उनको भनाइ छ ।

डिजिटल चिट लागु गरी सुदूरपश्चिम प्रदेशका १२ स्थानबाट सो प्रणाली संचालन गरिएको र जसका कारण समयको बचत तथा अनावश्यक झन्झटको अन्त्य र पारदर्शी भइरहेको उनले बताए । चोरी पैठारी गरी संचालनमा रहेका ११ थान मोटरसाइकललाई नियन्त्रणमा लिइ आवश्यक कारवाहीका लागि भन्सार कार्यालयमा पठाइएको पनि उनले बताए । समग्र रुपमा दुर्घटना न्युनिकरणका लागि सक्दो प्रयासमा रहेको उनले बताए ।