धनगढी । सशस्त्र प्रहरीले कैलालीमा २५ लाख भन्दा बढी मूल्यको कपडा बरामद गरेको छ । सशस्त्र प्रहरी बल, नेपाल नं. ३४ गण हेडक्वाटर कैलालीले उक्त सामान बरामद गरेको हो ।
सशस्त्र प्रहरी बैद्यनाथ वाहिनी मुख्यालय कैलालीका सूचना अधिकारी एवं सशस्त्र प्रहरी उपरीक्षक वीरेन्द्रबहादुर ऐरका अनुसार जिल्लाको धनगढी उपमहानगरपालिका–१९ खेदाघाटस्थित मोहना नदी पारी खेदा गाउँमा रहेको गोठ जस्तो छाप्रोबाट सोमबार सो मूल्यको कपडा बरामद गरेको हो ।
भारतबाट भन्सार छली अवैध रूपमा नेपाल भित्र्याइ बेवारिसे अवस्थामा लुकाइ राखिएको अवस्थामा लेडिज सुट, साडी,कुर्ता सुरुवाल, थानका कपडा र बच्चाका कपडासहित २४ गाँठ कपडा बरामद गरिएको उनले बताए ।
विशेष सूचनाका आधारमा सशस्त्र प्रहरी बल नेपाल नं. ३४ गण हेडक्वाटरबाट सशस्त्र प्रहरी उपरीक्षक सुरेन्द्रराज रञ्जितको कमाण्डमा खटिएको ३१ जनाको टोलीले उक्त सामान बरामद गरेको उनले जानकारी दिए ।
बरामद गरिएका समानहरु आवश्यक कारबाहीका लागि कैलाली भन्सार कार्यालय धनगढीमा बुझाइएको जनाइएको छ ।
