धनगढी । धनगढी उपमहानगरपालिका–१४ फूलबारीस्थित हाम्रो गौशालाको व्यवस्थापन सहज बनाउन धनगढी उपमहानगरपालिकाले ट्र्याक्टर उपलब्ध गराएको छ ।
उपमहानगरपालिकाकी नगर उपप्रमुख कन्दकला राणाले सोमबार गौशाला व्यवस्थापन समितिका अध्यक्ष यादवकुमार भण्डारीलाई ट्र्याक्टर हस्तान्तरण गरेकी हुन् । ट्र्याक्टर उपलब्ध भएपछि गाईका लागि आहारा व्यवस्थापन, गोबर व्यवस्थापनलगायत दैनिक काममा सहज हुने अपेक्षा गरिएको छ ।
हाम्रो गौशालामा अहिले करिब ३ सय ६५ वटा गाई रहेका छन् । ती गाईको हेरचाहका लागि ८ जना गोठाला कार्यरत छन् । उपमहानगरपालिकाले ५० वटा गाई बराबर एक जना गोठाला रहने गरी प्रत्येकलाई मासिक १० हजार रुपैयाँ पारिश्रमिक उपलब्ध गराउँदै आएको छ ।
गौशाला व्यवस्थापन समितिले भने आन्तरिक आम्दानीबाट गोठालालाई थप ५ हजार रुपैयाँ दिने गरेको अध्यक्ष भण्डारीले बताए । गौशालाको आन्तरिक आम्दानीको मुख्य स्रोत गाईको गोबर र दूध बिक्री हो ।
उपमहानगरपालिकाका पशु चिकित्सक डा. समीर ठाकुरका अनुसार गौशालामा रहेका गाईको उपचार तथा आहाराका लागि पनि उपमहानगरपालिकाले सहयोग गर्दै आएको छ । चालु आर्थिक वर्षमा पशु चौपाया व्यवस्थापनका लागि करिब ३५ देखि ४० लाख रुपैयाँ बजेट विनियोजन गरिएको छ ।
उक्त बजेटको ठूलो हिस्सा गोठालाको पारिश्रमिकमा खर्च हुने गरेको छ। बाँकी रकम गाईको आहारा, औषधि तथा हेरचाहमा खर्च हुने गरेको डा. ठाकुरले बताए ।
ट्र्याक्टरले गौशालाको दैनिक व्यवस्थापनमा महत्वपूर्ण सहयोग पुग्ने अध्यक्ष भण्डारीले बताए । उनले गौशालालाई सहयोग गरेकोमा उपमहानगरपालिकाप्रति आभार व्यक्त गरे ।
