धनगढी । धनगढी उपमहानगरपालिकाले दुई सामुदायिक विद्यालयलाई ८८ सेट डेस्क–बेन्च वितरण गरेको छ ।
उपमहानगरपालिकाले विद्यालयको शैक्षिक गुणस्तर सुधार कार्यक्रमअन्तर्गत वडा नम्बर १६ स्थित श्री बेहडाबाबा माध्यमिक विद्यालयलाई ५० सेट र वडा नम्बर १८ स्थित श्री चन्द्रोदय माध्यमिक विद्यालयलाई ३८ सेट डेस्क–बेन्च वितरण गरेको हो ।
उपमहानगरपालिकाकी उपप्रमुख कन्दकला रानाले सामुदायिक विद्यालयको शैक्षिक गुणस्तर सुधारका लागि भौतिक पूर्वाधार विकाससँगै शिक्षक तालिमलगायतका कार्यक्रम सञ्चालन भइरहेको बताइन् । विद्यालयको आवश्यकता पहिचान गरी डेस्क–बेन्च वितरणलगायत सहयोगलाई आगामी दिनमा पनि निरन्तरता दिइने उनले बताइन् ।
डेस्क–बेन्च बुझ्दै चन्द्रोदय माध्यमिक विद्यालयका व्यवस्थापन समिति अध्यक्ष तथा वडा नम्बर १८ का वडाध्यक्ष भुवन रिजालले शिक्षालाई संविधानले मौलिक हकका रूपमा सुनिश्चित गरेको भन्दै शैक्षिक गुणस्तर सुधारमा स्थानीय तहले थप ध्यान दिनुपर्ने बताए ।
डेस्क–बेन्च हस्तान्तरण कार्यक्रममा नगरप्रमुख गोपाल हमाल, प्रमुख प्रशासकीय अधिकृत जनकराज भट्टलगायतको उपस्थिति थियो ।
