धनगढी । कैलालीको गोदावरी नगरपालिका-१ स्थित कृषि हाटबजारको हाता भित्र निर्माण गरिएको शीतभण्डार सञ्चालन नहुँदा कृषकहरु समस्यामा पर्न थालेका छन् ।

२०८१ असार २२ गते निर्माण सम्पन्न भइसक्दा पनि सो शीतभण्डार सञ्चालनको कुनै सुरसार नहुँदा कृषकहरु समस्यामा पर्न थालेका हुन् ।

शीतभण्डार निर्माणका लागि कृषि विकास निर्देशनालयले १ करोड १६ लाख ७७ हजार ९६३ रुपैयाँ विनियोजन गरेको निर्देशनालयका निर्देशक खगेन्द्रप्रसाद शर्माले निशाना न्युजलाई जानकारी दिए । अंशु निर्माण सेवा नवदुर्गा डडेल्धुरासंग ९२ लाख ४२ हजार १६६ रुपैयाँमा ठेक्का सम्झौता भएको उनले बताए । शीतभण्डार निर्माण सम्पन्न हुँदासम्म ९१ लाख १६ हजार ४२५ रुपैयाँ यथार्थ खर्च भएको उनले बताए ।

उनले भने ‘हामीले हस्तान्तरण गत बर्ष नै गर्ने भन्ने थियो तर कृषि व्यवस्थापन समितिको आनाकानीका कारण हस्तान्तर हुन सकेन । उनीहरु अपूरो छ भन्न थाले । अहिले चालु आर्थिक वर्षमा फेरि ९ लाख बजेट छुट्याइएको छ ।’

बाँकी काम पूरा गरेर नै हस्तान्तरण गर्ने उनले बताए । यो बर्ष जसरी पनि हस्तान्तरण गर्ने उनले बताए । उनले भने ‘हामीले निर्माण गरिदिने हो, समितिलाई हस्तान्तरण गर्छौँ । तर,सानातिना कुराहरुलाई हेरविचार गर्ने मर्मत सम्भार गर्ने उनीहरुको काम पनि होनी ? सधैभरी हामीले जिम्मा लिइराख्ने त होइनौं ?’

वन मन्त्रालयको जग्गा कृषि व्यवस्थापन समितिले उपभोग गर्दै आएको छ । सोही जग्गामा निर्माण गरिएको शीतभण्डार सञ्चालनमा आउन नसक्नु राज्यको लापरबाही रहेको कृषकहरुको गुनासो रहेको छ ।

निर्माण सम्पन्न हुन ७ बर्ष लागेको र निर्माण पश्चात पनि शीतभण्डारमा पानी चुहिने गरेको कृषि व्यवस्थापन समितिका अध्यक्ष डिल्लीराज जोशीले निशाना न्युजलाई जानकारी दिए । शीतभण्डार समयमा सञ्चालनमा आएको भए बिषादी कृषिजन्य वस्तु रोक्न सहज हुने उनले बताए ।

किसानलाई बचाउन पनि शीतभण्डार सञ्चालन गर्न आवश्यक रहेको उनले बताए । ‘३५ प्रतिशतसम्म कार्बोनेट,अर्गानो फस्फेटको मात्रा छ भने त्यो कृषिजन्य वस्तु खानयोग्य हुन्छ । ३५ देखि ४५ प्रतिशत छ भने केही दिन क्वारेन्टाइन गर्नुपर्ने अर्थात रोकावट हुन्छ’ उनले भने ‘रोकावट समयमा कोल्डस्टोरमा राख्न सकिन्थ्यो । फेरि ल्याव टेस्ट गरेर खानयोग्य छ भने बजारमा पठाउन सकिन्छ । जसले गर्दा किसान र खरिद गर्ने व्यापारीको क्षति हुन पाउदैन । किसान बचाउन पनि शीतभण्डार सञ्चालन गर्न आवश्यक छ ।’

उनले भने ‘भदौ भित्र कोल्डस्टोर समितिलाई हस्तान्तरण गरी संचालन गर्ने भन्ने छ । आशावादी त छौँ । तर ढुक्क चाहिँ छैनौं । रेखदेख कसैको छैन । छिटो हस्तान्तरण गरेको भए समितिले रेखदेख गर्ने थियो ।’

व्यवस्थापन समितिको काम व्यापारी र कृषकलाई जोडिदिने,उत्पादनलाई बजारीकरणका लागि सहयोग गर्ने,कृषकका समस्या समाधान गर्न तिर केन्द्रित हुने रहेको उनले बताए । नेपालभरी ११ वटा हाटबजार रहेको र ती सबै कृषि विभागको निर्देशन अनुसार चल्ने गरेको उनले बताए । उनले भने ‘यो हाटबजार पनि सोही आधारमा चल्छ र आफू खुशी केही गर्न पाउदैनौँ ।’