धनगढी । धनगढी उपमहानगरपालिकाले सुदूरपश्चिममै पहिलोपटक स्वास्थ्यजन्य फोहोरमैला व्यवस्थापन केन्द्र सञ्चालन गर्ने तयारी गरेको छ । उपमहानगरले वडा नं. २ मा केन्द्र संचालनका लागि तयारी थालेका हो ।
केन्द्र सञ्चालनका लागि आवश्यक पर्ने ३ वटा मेसिन ल्याइ सकेको उपमहानगरपालिकाका वातावरण अधिकृत अशोक अवस्थीले जानकारी दिए । स्वास्थ्य संस्थाहरुबाट निस्कने जोखिमयुक्त फोहोरमैला व्यवस्थापनका लागि फोहोर व्यवस्थापन केन्द्र सञ्चालनमा ल्याउन लागिएको उनले बताए ।
स्वास्थ्य संस्थाबाट संकलित फोहोरलाई व्यवस्थापन केन्द्रमा ल्याएर नष्ट गरिने उनले बताए । केन्द्रमा ल्याइएको फोहोरलाई अटो–क्लेभ मेसिनमा राखेर निर्मलिकरण गरिने उनले बताए । त्यसपछि अरु फोहोरसँग मिलाउन मिल्ने उनले बताए ।
उनले कुनै पनि स्वास्थ्य संस्था स्थापना गर्दा फोहोर व्यवस्थापन योजना बनाउनु पर्ने उनले बताए । उनले स्वास्थ्य संस्थाबाट निस्किने फाहोरको व्यवस्थापन गर्ने दायित्व सम्बन्धित स्वास्थ्य संस्थाको नै हुने उनले बताए ।
उनले भने ‘उहाँहरुले व्यवस्थापन गर्न नसक्दा हामीले यो व्यवस्थापन गरेका हौँ । हामीले व्यवस्थापन गर्दा उहाँहरुले प्रतिकेजीको हिसाबमा शुल्क तिर्नुपर्ने हुन्छ ।’
उच्च तापक्रम र प्रेसरमा राखेर फोहोरमैलामा रहेको जिवाणु नष्ट गरिने सरसफाइ सहजकर्ता मानबहादुर अधिकारीले बताए ।
यूएनडिपी विश्व वातावरण कोषको साना अनुदान कार्यक्रमको आर्थिक सहयोग र हेकाफ ३६० को प्राविधिक सहयोगमा केन्द्र बनाइएको जनाइएको छ ।
