धनगढी । कैलालीको गोदावरी नगरपालिका गेटामा रहेको सहिद दशरथ चन्द राष्ट्रिय स्वास्थ्य विज्ञान विश्वविद्यालयका माग सहितको ज्ञापन पत्र शिक्षा, विज्ञान तथा प्रविधि मन्त्री महावीर पुनलाई बुझाइएको छ । बिहीबार सहिद दशरथ चन्द राष्ट्रिय स्वास्थ्य विज्ञान विश्वविद्यालय सरोकार तथा समन्वय समितिले शिक्षा मन्त्रीलाई धन्यवाद सहितको ज्ञापन पत्र बुझाएको हो ।
ज्ञापन पत्रमा विश्वविद्यालय ऐन कार्यान्वयनका लागि पहल गरेकोमा धन्यवाद दिँदै विश्वविद्यालयको उपकुलपति र रजिस्ट्रार नियुक्तिका साथै अन्य हुने महत्त्वपूर्ण नियुक्तिहरूमा निष्पक्षता अपनाउन माग गरिएको छ ।
सरोकार तथा समन्वय समितिका संयोजक लोकराज पाण्डे (आगो), सह संयोजक आनन्द प्रसाद भट्ट र सचिव धर्मसिंह कुँवरको हस्ताक्षर रहेको ज्ञापन पत्रमा विश्वविद्यालयमा तत्काल ६ सय शय्याको अस्पताल सञ्चालन गरी यसै वर्षदेखि एमबिबिएस अध्ययन अध्यापन सुरु गर्न माग गरिएको छ ।
साथै बाँकी विश्वविद्यालय सभा सदस्य तत्काल मनोनीत गरी विश्व विद्यालय सभालाई पूर्णता दिन पनि माग गरिएको छ । विश्वविद्यालयको ऐन अनुसार शिक्षा मन्त्री विश्वविद्यालयको सह कुलपति रहने र उनकै अध्यक्षतामा सभा बस्ने व्यवस्था छ ।
ज्ञापन पत्र बुझ्दै शिक्षामन्त्री पुनले उपकुलपति, रजिस्ट्रार नियुक्ति प्रक्रियामा रहेकाले अन्य नियुक्तिका पद पनि तत्काल टुङ्गोमा लगाउने बताए ।
ज्ञापन पत्र बुझ्दै शिक्षा विज्ञान तथा प्रविधि मन्त्री महाविर पुनले सहिद दशरथ चन्द राष्ट्रिय स्वास्थ्य विज्ञान विश्वविद्यालय गेटामा पूर्ण क्षमताको अस्पताल सुरू गर्ने बताए । अहिले स्वास्थ्य मन्त्रालय मातहत रहेको अस्पताललाई शिक्षा मन्त्रालय मातहत ल्याएर छिट्टै ६ सय शय्याको अस्पताल सञ्चालनमा ल्याइने मन्त्री पुनले बताए ।
मन्त्री पुनले तत्काल ६ सय शय्याको अस्पताल र यसै वर्ष चिकित्सा शास्त्र अध्यान सञ्चालनसँगै उपकुलपति र रजिस्ट्रार नियुक्त गरिने बताएका छन।
