धनगढी । कैलालीको कैलारी गाउँपालिकाका अध्यक्ष राजसमझ चौधरीले जेनजी आन्दोलनपछि विभिन्न समस्याका बाबजुद सेवा प्रवाह गरिरहेको बताएका छन् ।
निशाना न्युजसँगैको कुराकानीमा उनले जेनजी आन्दोलनमा पालिकामा ठूलो क्षति भएपनि सेवा प्रवाहलाई निरन्तरता दिइएको बताए ।
उनले भने ‘जेनजी आन्दोनमा भएको तोडफोड र आगजनीबाट पालिकामा भएका कम्युटर,महत्पवूर्ण कागजात जलेका छन् । २ नं. वडा कार्यालयबाहेक सबै वडा कार्यालय नष्ट भएका छन् ।’
उनले भने ‘केही समय वडा कार्यालयको सेवा पनि पालिकाबाटै प्रदान गरेका थियौँ । अहिले सबै वडाबाट नै सेवा प्रवाह गरिरहेका छौँ ।’
उनले विभिन्न संघसंस्था,व्यक्तीलाई पालिकाले सहयोगको अपील गरेको र संघ संस्था,व्यक्तीबाट प्राप्त कम्प्युटर,ल्याप्टप,दराज,कुर्सीलगायतबाट सेवा प्रवाह भइरहेको बताए ।
उनले क्षति भएका वडा कार्यालयहरुको कामकाज खाली रहेका विद्यालय भवन,स्वास्थ्य संस्थाका भवन,सामुदायिक भवनलगायतबाट भइरहेको बताए । सेवाको प्रभावकारिताका लागि कार्यपालिकामा छलफल भएको बताउँदै उनले केन्द्र र प्रदेश सरकारमा पहल भइरहेको बताए ।
उनले भने ‘समस्या त धेरै छन् । त्यसलाई व्यवस्थापन गरेर सबै वडाबाट सेवा प्रवाह गरिरहेका छौँ ।’
