धनगढी । कैलालीमा स्थायी बन्ध्याकरण गर्ने महिलाको संख्या बढ्दै गएको छ । हरेक वर्ष स्वास्थ्य कार्यालयले सञ्चालन गर्ने स्थायी बन्ध्याकरण शिविरमा महिला सहभागिता बढ्न थालेको हो ।
पछिल्ला तीन वर्षको तथ्यांक हेर्ने हो भने जिल्लामा स्थायी बन्ध्याकरण गर्ने महिलाको तुलनामा पुरुषको संख्या एकदमै न्युन देखिन्छ । परिवार नियोजनको स्थायी बन्ध्याकरण मिनिल्याप महिला र भ्यासेक्टोमी पुरुषले गर्ने गरेका छन् ।
यस वर्ष कार्यालयले यही मंसिर ८ गतेदेखि २६ गतेसम्म जिल्लाका विभिन्न १० ठाउँमा स्थायी बन्ध्याकरण घुम्ती शिविर आयोजना गरेको थियो ।
उक्त स्थायी बन्ध्याकरण घुम्ती शिविरमा सन्तानको रहर पुगेका २ सय ११ जनाले स्थायी बन्ध्याकरण सेवा लिएका स्वास्थ्य कार्यालय कैलालीका परिवार नियोजन अधिकृत ओलटनारायण चापागाईंले जानकारी दिए ।
जसमध्ये महिला १ सय ९३ र पुरुष १८ जना रहेको उनले बताए । त्यस्तै, गत आव २०८१/८२ मा स्वास्थ्य कार्यालयले जिल्लाका विभिन्न ठाउँमा सञ्चालन गरेको स्थायी बन्ध्याकरण शिविरमा २ सय ४२ जनाले सेवा लिएको उनले जानकारी दिए । जसमध्ये महिला २ सय २० र पुरुष २२ जना रहेका थिए ।
त्यस्तै,अघिल्लो आव २०८०÷८१ मा कार्यालयले जिल्लाका विभिन्न ठाउँमा सञ्चालन गरेको स्थायी बन्ध्याकरण शिविरमा २ सय ४६ जनाले स्थायी बन्ध्याकरण सेवा लिएकोमा २ सय २० महिला र २६ जना पुरुष रहेको उनले जानकारी दिए । पछिल्ला तीन वर्षको तथ्यांक हेर्दा हरेक वर्ष स्थायी बन्ध्याकरण गर्नेमा पुरुषको तुलनामा महिलाको संख्या नै बढी देखिन्छ ।
स्थायी बन्ध्याकरणले कमजोर भइन्छ भन्ने गलत मान्यताले स्थायी बन्ध्याकरणमा पुरुषको सहभागिता कम हुने गरेको परिवार नियोजन अधिकृत चापागाईंले बताए ।
स्वास्थ्य कार्यालय कैलालीका प्रमुख रमेश कुँवरले पुरुषले स्थायी बन्ध्याकरण गर्दा काम गर्न अप्ठ्यारो हुन्छ भन्ने भ्रमलगायतका कारण स्थायी बन्ध्याकरणमा पुरुषको सहभागिता कम हुने गरेको बताए ।
स्थायी बन्ध्याकरण महिलालाई भन्दा पुरुषलाई सहज हुने बताउँदै उनले कार्यालयले त्यस बिषयमा परामर्श पनि गर्ने गरेको बताए ।
