धनगढी । २०८१ सालको फागुनमा धनगढी उपमहानगरपालिकाले संचालन गरेको सीप तथा रोजगारमेलाबाट सिकेको सीपलाई सदुपयोग गर्दै आएकी छन् धनगढी–८ बस्ने अनिता चौधरी ।
उनले सीप तथा रोजगार मेलाबाट टायल मार्बल फिटिङ सम्बन्धीको तालिम लिएकी थिइन् । घरमा टायल मार्बल फिटिङ गर्ने काममा दक्ष भएकी उनलाई आजकल फुर्सद नै हुँदैन । सीप,कला, मेहनतसँगै इमान्दारिता देखेर टायल मार्बल लगाउने जो कोहीले उनलाई बोलाउने गर्दछन् ।
लामो समयदेखि ज्याला मजदुरी गरेर परिवारको पालन पोषण गरि रहेकी उनलाई सीप तथा रोजगार मेला बरदान सावित भएको छ । घरमा टायल मार्वल लगाउने कामबाट मासिक ४० हजार आम्दानी भइरको उनले बताइन ।
अहिले आफूलाई कामले गर्दा फुर्सद नहुने र दैनिक काम पाइरहेको उनले बताइन् । काठमाण्डौँ समेत काम गर्न जाने गरेको उनको भनाइ छ । ‘पहिला आर्थिक समस्याले अवस्था नाजुक हुँदा घरखर्च चलाउन समस्या हुने गरेको थियो’ उनले भनिन् ‘आजकल त्यस्तो समस्या हुँदैन ७ जनाको परिवारको घरखर्च मजाले चल्छ ।’
उनले यो कामबाट भएको आम्दानीले घर समेत निर्माण गरेको बताइन् । उनले भनिन् ‘केही ऋण छ,काम गरेर ऋण चुक्ता गरिरहेकी छु । ऋणले निरास छैन, हातमा सीप छ, काम गरेर ऋण चुक्ता गरिरहेकी छु ।’
उनले भनिन् ‘कान्छो छोरालाई होटल मेनेजमेन्ट पढाउँदै छु,जेठो छोरा सुनचाँदीको कालीगढ छ’ उनले खुशी हुँदै भनिन् ‘जीवन सुधार हुँदै गइरहेको छ । हातमा सीप भएन भने गाह्रो हुँदो रहेछ । पहिला खर्च चलाउन पटकपटक अरुको सहयोग माग्नु पर्ने थियो । आजकल त्यस्तो छैन् ।’
अहिले आर्थिक सुधार भएको र खर्च कसरी चलाउने भन्ने समस्या नहुने गरेको उनले बताइन् । उनले भनिन् ‘हामी जस्ता महिलाको साथी बनेकोमा धनगढी उपमहानगरपालिकालाई धन्यबाद छ । यदी सीप तथा रोजगार मेलाको आयोजना हुने थिएन भने म जस्ता थेरै महिलाहरु सीप सिक्नबाट बञ्चित हुन्थे । सीप तथा रोजगार मेलाबाट सीकेको सीपलाई व्यवहारमा उतार्दै काममा लागेका छौँ ।’
आर्थिक उन्नतिसँगै जीवनयापन गर्न पनि सहज भइरहेको उनले बताइन् । ‘धेरै ठाउँबाट काम आउँछ फुर्सद हुँदैन’ उनले भनिन् ‘केही दिन धनगढीमा काम छ, त्यसपछि काठमाण्डौँ बोलाएको छ । काठमाण्डौँको काम सकेपछि धनगढी नै फर्किन्छु ।’
