धनगढी । धनगढीमा भुवापर्व महोत्सव भुवाचाली खेल प्रतियोगिता–२०८२ हुने भएको छ । बाजुरेली समाज धनगढीको आयोजनामा भुवापर्व महोत्सव हुने भएको हो ।

समाजले आज धनगढीमा पत्रकार सम्मेलन गर्दै भुवापर्व महोत्सवको बारेमा जानकारी दिएको छ । पत्रकार सम्मेलनमा बोल्दै समाजका अध्यक्ष भरत केसीले महोत्सव पुस ४ गतेदेखि ६ गतेसम्म सञ्चालन हुने बताए ।

उनले पुस ४ गते भुवापर्व महोत्सवको औपचारिक उद्घाटन तथा भुवाचाली खेल प्रदर्शन,५ गते भुवाचाली खेल प्रतियोगिता र ६ गते पुरस्कार, प्रमाणपत्र तथा प्रशंसापत्र वितरण, भुवाचाली प्रदर्शनी, देउडा लगायत विभिन्न मौलिक सांस्कृतिक प्रस्तुतिसहित महोत्सवको समापन हुने जानकारी दिए ।

भुवाचाली खेल प्रतियोगिता प्रथम हुने टिमलाई रु ५० हजारसहित प्रमाणपत्र,द्वितीयलाई रु. ३० हजारसहित प्रमाणपत्र र तृतीयलाई रु. २० हजारसहित प्रमाणपत्र प्रदान गर्नुका साथै सहभागी टिमलाई रु. १० हजारका दरले उपलब्ध गराइने उनले बताए ।

प्रतियोगितामा १० टिमको सहभागिता हुने अनुमानको रहेको बताउँदै उनले पुस ३ गतेसम्म टिम दर्ताको समय राखिएको उनले बताए ।
साथै महोत्सवमा प्रत्येक दिन भुवाचाली प्रदर्शन, लाइभ देउडा लगायत चर्चित कलाकारहरुको सांगीतिक प्रस्तुति समेत रहने उनले बताए ।
बाजुरेली समुदायलाई एकआपसमा संगठित गर्दै आपसी भाइचारा, सामाजिक सद्भाव तथा मौलिक सांस्कृतिक पहिचानको संरक्षण गर्ने उद्देश्यले महोत्सवको आयोजना गर्न लागिएको उनले बताए ।

उनले भने ‘भूवापर्वको ऐतिहासिक पृष्ठभूमि हेर्दा भारतको हरियाणा राज्यस्थित कुरुक्षेत्रमा पाँच भाइ पाण्डव र सय भाइ कौरवबीच भएको युद्धमा सत्यको पक्षमा रहेका पाण्डवहरूको विजय भएको जनविश्वास रहिआएको छ ।’

असत्यमाथि सत्यको विजयको खुसीयालीस्वरूप सो युद्धमा प्रयोग गरिएका ढाल र तरवार नचाई खेलिने खेल नै आजको भुवाचाली खेलको रूपमा विकास भएको ऐतिहासिक मान्यता रहेको उनले बताए ।

नयाँ पुस्तामा यो पर्व लोप भएर जान सक्ने सम्भावनालाई मध्यनजर गर्दै यसको संरक्षण, प्रवर्धन तथा पुस्तान्तरणका लागि बाजुरेली सेवा समाजले विगत तीन वर्षदेखि भुवापर्व महोत्सव भुवाचाली खेल प्रतियोगिता आयोजना गर्न लागेको उनले बताए ।