धनगढी । वि.सं. २०६२ साल फागुन १७ गते १५ शैयाबाट सञ्चालन स्वीकृति प्राप्त गरी स्थापना भएको नवजीवन अस्पताल प्रा.लि. हाल १०० शैयासम्मको स्वीकृतिसहित पूर्ण रूपमा सञ्चालनमा रही सुदूरपश्चिम क्षेत्रका नागरिकलाई गुणस्तरीय स्वास्थ्य सेवा प्रदान गर्दै आएको छ। समयक्रमसँगै सेवा विस्तार र पूर्वाधार विकास गर्दै अस्पतालले २०६८ सालमा ५० शैया र २०७९ असोजदेखि १०० शैयाको सञ्चालन स्वीकृति प्राप्त गरेको हो।
स्थापनाकालदेखि नै नवजीवन अस्पतालले उपचार सेवासँगै स्वास्थ्य जनशक्ति उत्पादनमा पनि महत्वपूर्ण योगदान पुर्‍याउँदै आएको छ। अस्पतालअन्तर्गत सञ्चालित नवजीवन कलेज अफ नर्सिङ एन्ड हेल्थ साइन्सेज प्रा.लि. मार्फत विभिन्न स्वास्थ्यसम्बन्धी शैक्षिक कार्यक्रम सञ्चालन गर्दै दक्ष तथा योग्य स्वास्थ्यकर्मी उत्पादन गर्दै आएको  छ। आज अस्पतालको २० ओ बार्षिक उत्सवमा अस्पतालका मेडिकल डाइरेक्टर डा. विदुरमणी ढकालले अस्पतालले दिदै आएको सेवाका वारेमा जानकारी दिए ।
उनले अस्पतालमा अर्थोपेडिक्स, प्रसूति तथा स्त्रीरोग, सामान्य चिकित्सा, बालरोग, मिर्गौला, कान–नाक–घाँटी, मानसिक रोग, छाला तथा यौन रोग, कलेजो, इन्डोक्राइन तथा मेटाबोलिजम, सामान्य शल्यक्रिया, न्युरो सर्जरी, मूत्ररोग, एनेस्थेसियोलोजी, आकस्मिक सेवा, रेडियोलोजी तथा इमेजिङ, प्याथोलोजीरप्रयोगशाला, दन्तरोग, फिजियोथेरापी तथा पुनर्स्थापना, नर्सिङ र फार्मेसी विभाग सञ्चालनमा रहेका बताए ।
नेपाल सरकारद्वारा सञ्चालित सामाजिक सुरक्षा कोष स्वास्थ्य बीमा, आमा सुरक्षा कार्यक्रम, निःशुल्क खोप कार्यक्रम तथा निःशुल्क क्षयरोग औषधि वितरण कार्यक्रमसमेत अस्पतालमार्फत सञ्चालन हुँदै आएको उनको भनाइ छ।
आ.व. २०७९ फागुनदेखि २०८२ माघ मसान्तसम्म अस्पतालले आकस्मिक सेवाबाट ४,३३६, बहिरङ्ग सेवाबाट ३५,००५ र अन्तरङ्ग सेवाबाट ६,९१० जना बिरामीलाई सेवा प्रदान गरेको छ। यस अवधिमा २,०७५ जनाले निःशुल्क सुत्केरी सेवा तथा ३,२३२ जना बालबालिकाले निःशुल्क खोप सेवा लिएका छन्। अस्पतालभित्र तथा विभिन्न स्थानमा सञ्चालन गरिएका स्वास्थ्य शिविरमार्फत ६,३२८ जनाले सेवा प्राप्त गरेका छन्।
सुदूरपश्चिम क्षेत्रको स्वास्थ्य क्षेत्रमा निरन्तर योगदान दिँदै आएको नवजीवन अस्पतालले सेवा विस्तार र गुणस्तर अभिवृद्धिमा जोड दिँदै जनताको विश्वास जित्दै आएको उनले बताए ।