धनगढी । सत्ता साझेदार दल नेकपा एमालेले सुदूरपश्चिम प्रदेश मन्त्रिपरिषद्को बैठक बहिष्कार गरेको छ।
एमालेका मन्त्रीहरूको अनुपस्थितिकैबिच मुख्यमन्त्री कमलबहादुर शाहको अध्यक्षतामा बसेको बैठकले प्रदेशका पाँच वटा अस्पतालमा नयाँ व्यवस्थापन समिति अध्यक्षहरू चयन गरेको छ।
नेपाली कांग्रेसका दुई मन्त्री र मुख्यमन्त्री मात्र सहभागी उक्त बैठकले रिक्त रहेका प्रादेशिक तथा जिल्ला अस्पतालहरूमा राजनीतिक नियुक्ति गर्ने निर्णय गरेको हो।
मन्त्रिपरिषद्को निर्णयअनुसार टिकापुर प्रादेशिक अस्पतालको व्यवस्थापन समिति अध्यक्षमा टिकापुर नगरपालिका–१ का रामबहादुर भण्डारी नियुक्त भएका छन्। यस्तै, जिल्ला अस्पताल दार्चुलाको नेतृत्व महाकाली नगरपालिका–५ का तोरणप्रसाद अवस्थीलाई सुम्पिएको छ।
बैतडी जिल्ला अस्पतालको अध्यक्षमा दशरथचन्द नगरपालिका–३ निवासी धनबहादुर क्षेत्री चयन भएका छन् भने बाजुरा जिल्ला अस्पतालको जिम्मेवारी खप्तडछेडेदह गाउँपालिका–५ का धनबहादुर रावतले पाएका छन्। यसैगरी बझाङ जिल्ला अस्पताल व्यवस्थापन समितिको अध्यक्षमा जयपृथ्वी नगरपालिका–३ का वीरेन्द्रबहादुर खड्का नियुक्त भएका छन्।
आजको नियुक्तिमा बझाङ बाहेक अन्य सबै अस्पतालका अध्यक्षहरू नेपाली कांग्रेस निकट रहेका छन्। सत्ता पक्षभित्रको आन्तरिक असमझदारीका कारण एमालेले बैठक बहिष्कार गरे पनि मुख्यमन्त्री शाहले नियुक्ति प्रक्रियालाई अगाडि बढाएका हुन्।रातोपाटीबाट
