कैलाली । अपाङ्गता भएका नागरिकको जिवनयापन सहज बनाउने उदेश्यले चार वर्षको अबधिमा धनगढी उपमहानगरपालिकाले ४९४ जना अपाङ्गता भएका नागरिकलाई २० प्रकारका ५३८ सहायक सामग्री वितरण गरेको छ ।
आज उपमहानगरपाकिाले पत्रकार सम्मेलनको आयोजना गरी सो कुराको जानकारी दिएको हो । आर्थिक वर्ष २०७९.८० मा १८९ जनालाई २०५ सामग्री, २०८०.८१ मा १९६ जनालाई २१७ सामग्री, २०८१. ८२ मा १०९ जनालाई ११६ सामग्री र चालु आर्थिक वर्ष २०८२. ८३ मा २५७ जनालाई स्क्रिनिङ्ग गरी ३१८ सामग्री वितरण गरिएको धनगढी उपमहानगरपालिकाका स्वास्थ्य शाखा प्रमुख योगेश अवस्थीले जानकारी दिए ।
क्लस्टरअनुसार फूलबारी क्षेत्रमा १२८ जनाले १३९ सामग्री, उर्मा क्लस्टरमा ११८ जनाले १२५ सामग्री, जुगेडा क्लस्टरमा ९० जनाले ९५ सामग्री, बेला क्लस्टरमा ६२ जनाले ६६ सामग्री र धनगढी क्लस्टरमा ९६ जनालाई ११३ सामग्री प्रदान गरेको उनले बताए । ।
यस अवधिमा १४६ व्हिलचेयर, ४५ ट्राइसाइकल, २० वाकर, १६ कृत्रिम हातखुट्टा, १०१ वाकिङ स्टिक, ५८ क्रचेज र एक सिपी चेयर वितरण गरिएको उपमहानगरले जनाएको छ।
हालसम्म ६५ लाख १६ हजार ४ सय रुपैयाँ बराबरको सामग्री वितरण भइसकेको छ भने चालु आर्थिक वर्षका लागि १८ लाख रुपैयाँ बराबरको सामग्री खरिद प्रक्रिया अगाडि बढाइएको छ।
नगर प्रमुख गोपाल हमालले स्थानीय सरकारले नागरिकमुखी सेवा प्रवाहलाई प्राथमिकता दिँदै अपाङ्गता भएका व्यक्तिलाई सम्मानपूर्वक जीवनयापनमा सहयोग पुर्याउन यस्तो अभियान सञ्चालन गरिएको बताए। उनले धनगढीका १९ वटै वडामा रहेका अपाङ्गता भएका नागरिकलाई खोज्दै हरेक वर्ष सहायक सामग्री वितरण गर्दै आएको उल्लेख गरे।
आर्थिक बर्ष २०७९ सालदेखि उपमहानगरपालिकालेअपाङ्गता नागरिकको जीवन सहज बनाउने उद्देश्यले खोजीखोजी निस्शुल्क सहायक सामग्री वितरण कार्यक्रम सञ्चालन गर्दै आएको छ।
उपमहानगरले अपाङ्गताको प्रकृतिअनुसार व्हिलचेयर, वाकर, कृत्रिम हातखुट्टा, बैसाखी, सेतो छडी, सिपी चेयर, क्रचेज, ट्राइसाइकल र कमोड चेयर लगायतका सामग्री उपलब्ध गराउँदै आएको छ। सम्मानपूर्ण जीवनयापन र सेवामा सहज पहुँच सुनिश्चित गर्ने लक्ष्यसहित यो कार्यक्रम अघि बढाइएको जनाइएको छ।
स्वास्थ्य शाखा प्रमुख योगेश अवस्थी का अनुसार, सहायक सामग्री आवश्यक पर्ने व्यक्तिको पहिचान गर्न हरेक वर्ष पालिकालाई पाँच क्लस्टरमा विभाजन गरी स्क्रिनिङ्ग शिविर सञ्चालन गरिन्छ। त्यसपछि सम्बन्धित व्यक्तिको घरदैलोमै पुगेर सामग्री वितरण गर्ने गरिएको छ।
उपमहानगरपालिकालेआफ्ना नागरिकलाई बिरामी भएको अवस्थामा निस्शुल्क रगत प्रदान गर्दै
साथै उपमहानगरपालिकाले आफ्ना नागरिकलाई बिरामी भएको अवस्थामा निस्शुल्क रगत प्रदान गर्दै आएको छ। उपमहानगरले बिरामीलाई आवश्यक पर्ने रगत निस्शुल्क उपलब्ध गराउँदै आएको हो ।
आर्थिक वर्ष २०८१.८२ मा ४६० जना बिरामी तथा चालु आर्थिक वर्षको फागुनसम्म २१३ जना बिरामीसहित कुल ६७३ जनालाई निस्शुल्क रगत तथा रगतजन्य पदार्थ उपलब्ध गराएको छ।
उपमहानगरले आर्थिक वर्ष २०८१.८२ मा एक हजार ५३० पिन्ट तथा चालु आर्थिक वर्षको फागुनसम्म थप ५८२ पिन्टसहित नागरिकलाई कुल दुई हजार १२२ पिन्ट रगत तथा रगतजन्य पदार्थ निस्शुल्क उपलब्ध गराएको जनाएको छ।
गत आर्थिक वर्षमा सरकारी तथा निजी अस्पतालमा उपचार गरेका बिरामीलाई रगत उपलब्ध गराएकोमा यो वर्षबाट सरकारी अस्पतालमा प्रदेश सरकारले रगत उपलब्ध गराउने नीति लिएकाले निजी अस्पतालमा भर्ना भएका बिरामीलाई निस्शुल्क रगत उपलब्ध गराइरहेको नगर प्रमुख गोपाल हमालले बताए।
उनले बिरामीलाई जतिसुकै रगत आवश्यक परे पनि निस्शुल्क उपलब्ध गराइरहेको बताए। उनले भने, गत आर्थिक वर्षमा एक जना बिरामीलाई ३३ पिन्ट रगत उपलब्ध गराइएको छ, जसका कारण बिरामीको करिब ३८ हजार बचत भएको छ।
उपमहानगरपालिकाले उपलब्ध गराएको तथ्याङ्कअनुसार सबैभन्दा बढी रगत जनजाति समूहलाई आवश्यक परेको छ। निस्शुल्क रगत लग्नेमा ४२४ जना जनजाति, १९५ जना ब्राह्मणरक्षेत्री, ४८ जना दलित, चार जना मधेसी तथा एक जना मुस्लिम र एक जना अन्यले निस्शुल्क रगत सेवा पाएका छन्।
उपमहानगरपालिकाले जीवन रक्षा गर्न आवश्यक रगत उपलब्ध गराए बापत नेपाल रेडक्रस धनगढी शाखालाई २४ लाख ४० हजार तीन सय रुपैयाँ भुक्तानी गरेको छ।
नागरिकको स्वास्थ उपचारमा सहयोग पुगोस् भनेर निस्शुल्क रगत उपलब्ध गराउन थालिएको नगर प्रमुख हमालले बताए।
