धनगढी । वातावरण संरक्षण तथा हरियाली प्रवर्द्धन गर्ने उद्देश्यले कैलालीको चुरे गाउँपालिका–६ फल्टुडेस्थित इलाका प्रहरी कार्यालय परिसरमा वृक्षारोपण कार्यक्रम सम्पन्न गरिएको छ।
चुरे गाउँपालिका र सिद्ध हरियाली सामुदायिक वनको सहयोगमा बुधबार आयोजित कार्यक्रममा गाउँपालिका उपाध्यक्ष धना देवी थापाको प्रमुख आतिथ्य रहेको थियो। कार्यक्रम इलाका प्रहरी कार्यालयका कार्यालय प्रमुख प्रहरी निरीक्षक किशोर जोशीको नेतृत्व तथा प्रहरी कर्मचारीहरूको सक्रिय सहभागितामा सम्पन्न भएको हो।
कार्यक्रमअन्तर्गत प्रहरी कार्यालय परिसरभित्र चिउरी, दालचिनी, सुन्तला, कागती, सयपत्री, गुलाफ, लाहुरेलगायत विभिन्न प्रजातिका फलफूल तथा अन्य बिरुवा रोपिएका छन्।
वृक्षारोपण कार्यक्रमले वातावरण संरक्षण, जैविक विविधताको प्रवर्द्धन तथा हरियाली विस्तारमा टेवा पुग्ने विश्वास व्यक्त गरिएको छ। साथै, यस्ता कार्यक्रमलाई आगामी दिनमा पनि निरन्तरता दिँदै वातावरण संरक्षणप्रति समुदायको सहभागिता बढाइने आयोजकले जनाएको छ।
