कैलाली ।आइतबार शुक्लाफाँटा राष्ट्रिय निकुञ्ज क्षेत्रभित्र च्याउ खोज्न जाँदा सम्पर्कविहीन भएका कञ्चनपुरका १४ जना महिला सकुशल फेला परेका छन् ।
जिल्ला प्रहरी कार्यालय कञ्चनपुरका प्रवक्ता डीएसपी टेकबहादुर रावतका अनुसार सोमबार बिहान पौने ६ बजेतिर लक्ष्मी थापामगर, मञ्जु क्षेत्री र सीता चौधरीले टेलिफोनमार्फत घरमा सम्पर्क गरेका थिए ।
त्यसपछि शुक्लाफाँटा राष्ट्रिय निकुञ्ज सुरक्षार्थ खटिएको रणसिंह दल गणका सहसेनानी सुमन केसीको टोलीले आज सोमबार बिहान उनीहरूलाई जंगलमै फेला पारी सकुशल उद्धार गरी परिवारको जिम्मा लगाएको छ ।
प्रहरीका अनुसार वर्षाका कारण जंगलमा लागेको बाक्लो कुहिरोका कारण उनीहरू बाटो बिराएका थिए । घर फर्किने बाटो नभेटिएपछि सम्पर्कविहीन भएका थिए ।
उनीहरूले आइतबार अनुमति नलिई लुकीछिपी च्याउ खोज्न निकुञ्ज प्रवेश गरेको प्रहरीको भनाइ छ । डीएसपी रावतले सबैजनालाई फेला पारी आ-आफ्नो घर पठाइसकिएको बताए ।
