धनगढी । सुदूरपश्चिम प्रदेशमा एक महिनामा अवैध लागूऔषधसहित १७४ जना पक्राउ परेका छन् । गत असारको एक महिनाको अवधिमा प्रदेशका विभिन्न जिल्लाबाट अवैध लागूऔषधसहित उनीहरु पक्राउ परेका हुन् ।
लागूऔषसहित पक्राउ पर्नेमा १ सय ६७ पुरुष र ७ जना महिला रहेका सुदूरपश्चिम प्रदेश प्रहरी कार्यालय धनगढीका प्रवक्ता प्रहरी वरिष्ठ उपरीक्षक पदमबहादुर बिष्टले जानकारी दिए ।
सो एक महिनाको अवधिमा अवैध लागूऔषध चरेश ३ किलो ७३६ ग्राम ६५६ मिलिग्राम,खैरो हेरोइन १६१ ग्राम ५४० मिलिग्राम, गाँजा ५३६ ग्राम ३७९ मिलिग्राम तथा १८ एम्पुल फेनारगन,३० ब्रोहफन, ३९ ट्याब्लेट बरामद गरिएको उनले जानकारी दिए ।
त्यस्तै,सो एक महिनामा लागूऔषध सम्बन्धी ९४ वटा मुद्धा दर्ता भएको उनले जानकारी दिए ।
एक महिनाको अवधिमा घरेलु हिंसा तर्फ १ सय ५० वटा उजुरी परेकामा १ सय ४५ वटा उजुरीमा मिलापत्र भएको, ४ वटा अदालत पठाइएको तथा एक उजुरी प्रकृयामा रहेको सुदूरपश्चिम प्रदेश प्रहरी कार्यालयले जनाएकोे छ ।
त्यस्तै,सो एक महिनामा प्रदेशका विभिन्न जिल्लामा विभिन्न अपराध सम्बन्धिका ४०३ वटा मुद्धा दर्ता भएको प्रदेश प्रहरी कार्यालयको तथ्यांक छ । जसमध्ये ज्यान सम्बन्धी ७५,आत्महत्याका ५६,चोरी सम्बन्धी १७,संगठित आर्थिक अपराधका १०८,सामाजिक अपराधका ५५,महिला तथा बालबालिका सम्बन्धी अपराधका ३८,सवारी ज्यानका १३ र ४१ वटा अन्य मुद्धा दर्ता भएका जनाइएको छ ।
त्यस्तै, सो एक महिनाको अवधिमा सवारी दुर्घटनाबाट १३ जनाले ज्यान गुमाएको तथा १९७ जना घाइते भएको सुदूरपश्चिम प्रदेश प्रहरी कार्यालयको तथ्यांक छ । ८३ वटा सवारी दुर्घटना भएको तथा उक्त दुर्घटनामा १०७ वटा सवारी साधन दुर्घटनामा संलग्न रहेको जनाइएको. छ ।
५ हजार २५ सवारी साधन कारबाहीमा परेका र ४२ लाख ९२ हजार ५ सय राजस्व संकलन भएको जनाइएको छ ।
