धनगढी । घरेलु तथा साना उद्योग कार्यालय कैलालीमा गत आर्थिक वर्ष २०८२/०८३ मा ५ सय ५८ नयाँ उद्योग दर्ता भएका छन् ।
कार्यलयका उद्योग शाखा प्रमुख वालाराम भाटका अनुसार गत आर्थिक वर्षमा १३५ वटा उत्पादनमुल,१८२ वटा कृषिमूलक र २४२ वटा सेवामुलक घरेलु तथा साना उद्योग दर्ता भएका हुन् ।
हाससम्म जिल्लामा घरेलु तथा साना उद्योगको संख्या १६ हजार ३५ पुगेको उनले जानकारी दिए । दर्ता भएका मध्ये ६ हजार ६९९ वटा कृषि तथा वनजन्य,५ हजार ९२३ सेवामूलक,३ हजार ३३० उत्पादनमूलक,२ वटा निर्माणमूलक,६७ वटा पर्यटनमूलक र १४ वटा सूचना प्रविधिका रहेका उनले जानकारी दिए ।
गत आर्थिक वर्षमा स्थानीय व्यापारअन्तरगत वाणिज्यसम्बन्धी ५८५ वटा फर्म दर्ता भएका छन् । गत आर्थिक वर्षमा ३१९ वटा घरेलु तथा साना उद्योग र ३२७ वटा वाणिज्यतर्फका फर्मको लगतकट्टा गरिएको घरेलु तथा साना उद्योग कार्यालयले जनाएको छ ।
सो एक वर्षको अवधिमा १ हजार ५६५ घरेलु तथा साना उद्योग र ३ हजार २२५ वाणिज्यतर्फका फर्महरु नवीकरण गरिएका जनाइएको छ । ८४ वटा घरेलु तथा साना उद्योगले पुँजी वृद्धि गरेका,६५ उद्योगले नामसारी,३० उद्योगले ठाउँसारी र ४५ उद्योगले नाम परिवर्तन गरेको जनाइएको छ ।
कार्यालयले गत आर्थिक वर्षमा विभिन्न शीर्षकमा रु १ करोड २४ लाख १२ हजार ४९६ राजस्व संकलन गरेको जनाएको छ ।
