धनगढी । कृषि ज्ञान केन्द्र कैलालीले ‘कोदो बालीको संरक्षण र प्रवर्द्धन, खाद्य तथा पोषण सुरक्षा संवर्द्धन’ भन्ने मूल नाराकासाथ दोस्रो राष्ट्रिय कोदो दिवस २०८३ सम्पन्न गरेको छ ।
ज्ञान केन्द्रले शनिवार किसान,व्यवसायी,उद्यमीलगायतको उपस्थितमा एक कार्यक्रमको आयोजना गर्दै दोस्रो राष्ट्रिय कोदो दिवस मनाएको हो ।
कार्यक्रममा बोल्दै सुदूरपश्चिम प्रदेशका भूमि व्यवस्था,कृषि तथा सहकारी मन्त्रालयका प्रदेश सचिव शंकर शाहले कोदो बालीको संरक्षण र प्रवर्धन गर्नुपर्नेमा जोड दिए ।
उनले भने ‘कोदो स्वास्थ्यवर्धक बाली हो । कोदोजस्ता स्थानीय बालीको संरक्षण आवश्यक छ । कोदो बालीमा पानी कम चाहिने,हेरचाह पनि कम चाहिने, कोदो लामो समय भण्डारण गर्न मिल्ने बाली हो ।’
उनले कोदोको उत्पादन बढाउनुपर्नेमा जोड दिँदै त्यसका लागि मन्त्रालय आवश्यक समन्वय तथा सहकार्य गर्न तयार रहेको बताए ।
उनले यस्ता दिवसले कोदोप्रतिको दृष्टिकोण बदल्नुका साथै यसको महत्त्वबारे चर्चा हुने बताए ।
कार्यक्रममा बोल्दै कृषि ज्ञान केन्द्र कैलालीका वरिष्ठ कृषि प्रसार अधिकृत टेकबहादुर बिष्टले हिजोको दिनमा हेपिएको कोदो बालीको आज महत्त्व बढ्दै गएको बताए ।
उनले भने ‘यो बाली हाम्रो प्राचिन सभ्यतासँग जोडिएको छ । हिजो हाम्रा पूर्खा यही कोदो खाएर हुर्किए । तर, यो बाली हेपिएको थियो । जब यसबाट स्वास्थ्यमा हुने फाइदा थाहा भयो,अहिले यसको माग बढेको छ ।’
कार्यक्रमका सहभागी लक्ष्मीकान्त ढकालले कोदो स्वाथ्यका लागि अति नै राम्रो भएको बताउँदै यसको धेरै नै महत्त्व भएको बताए ।
उनले कोदो सामन्री मेहनत,थोरै खाद्यतत्व भएकोमा उत्पादन गर्न सकिने,पानी पनि थोरै भए पुग्ने भएकाले यस्को उत्पादनमा जोड दिनुपर्ने बताए ।
