धनगढी । कैलालीको गोदावरी नगरपालिका–९ स्थित भल्का(शिवकुण्ड) आन्तरिक पर्यटकको रोजाईमा पर्न थालेको छ । धार्मिक महत्व बोकेको शिवकुण्डमा वनभोज खान तथा रमाइलोका लागि आउने पनि बढ्दै गएका हुन् ।
स्थानीयले माघी,औंसी, पूर्णिमामा स्नान गर्दै आएको भल्का (शिवकुण्ड)मा पछिल्लो समय सानासाना समूह,संघ/संस्था,विद्यालयहरू वनभोजका लागि पुग्ने गरेका स्थानीय बताउँछन् ।
भल्कामा निरन्तररुपमा जमिनबाट पानी आइहेको हुन्छ । जमिनबाट आफै पानी आउने भएकाले यसलाई भल्का भन्ने गरेका स्थानीय बताउँछन् । भल्काका शिवमन्दिर पनि निर्माण गरिएको छ ।
गएको शनिबार भल्कामा भेटिएका धनगढीका दीपक विकले ‘भल्का’ वनभोज खान,घुम्न,रमाइलो गर्न राम्रो ठाउँ रहेको बताए । उनले भने ‘भल्का राम्रो छ भनेको सुनेको थिएँ । त्यसैले यहाँ घुम्न आएको हुँ । वास्तवमै राम्रो रहेछ । वनभोजका लागि पनि राम्रो ठाउँ रहेछ । शान्त वातावरण छ । भल्कामा पानी निरन्तर आइराख्ने रहेछ । यो देख्दा मलाई अचम्म लाग्यो ।’
चाडपर्व,विदाको दिन तथा अन्य समयमा भल्कामा घुम्न आउनेको भीड लाग्ने गरेको गोदावरी नगरपालिका–९ का वडाध्यक्ष रामलाल रानाले बताए ।
वनभोज तथा घुमफिरका लागि आउँनेको संख्या धेरै भए पनि आवश्यक पूर्वाधारको अभावका कारण समस्या हुने गरेको उनले बताए ।
उनले भने ‘यसलाई अझै व्यवस्थित बनाउन सके हुन्थ्यो । यहाँ धेरै पूर्वाधारको कमी छ । पक्की घेरबार गर्न पाए,बनभोज खाने ठाउँमा पानीको व्यवस्था,बिजुलीबत्ती, शौचालयको व्यवस्था गर्न पाए राम्रो हुने थियो ।’
उनले भने ‘यहाँ माघीमा त हामीले मेला नै लगाउँछौँ । यहाँ बाह्रै महिना मान्छे आउने गर्छन् । तिहारपछि बैशाखसम्म त मान्छे धेरै नै आउँछन् । वनभोज खाने मान्छेको भीड धेरै हुन्छ । चाडपर्वमा त थेगिनसक्नु भीड हुन्छ ।’
यहाँ आवश्यक पूर्वाधार निर्माणका लागि आफू निरन्तर लागि रहेको बताउँदै प्रदेश सरकारसँग पूर्वाधार निर्माणका लागि आग्रह गरेको वडाध्यक्ष रानाले बताए ।
पूर्वाधार निर्माण गर्न सके भल्का राम्रो पर्यटीय स्थल बन्न सक्ने उनको भनाइ छ । उनले भने ‘यहाँ भल्कामा आफै जमीनबाट पानी निरन्तर आइरहेको हुन्छ । यो चर्चित ठाउँ पनि हो । यहाँको वातारणरण शान्त पनि छ ।’
भल्कालाई पर्यटकीय क्षेत्रको रुपमा विकास गर्न सके यसको महत्व अझ बढ्दै जाने स्थानीयको भनाइ छ ।
